ஏகத்துவம் மார்ச் 2013

ஏகத்துவம் மார்ச் 2013

நிர்மூலமான இஜ்மா நீர்த்துப் போன ஸைபுத்தீன்

எண்பதுகளின் இறுதிக் கட்டத்தில் தமிழகமெங்கும் தவ்ஹீத் எனும் தீப்பந்தம் பற்றி எரிந்தது. அது காட்டுத்தீ போல் பரவ ஆரம்பித்த போது, அதை அணைப்பதற்கு, அந்த சத்தியக் கொள்கையை அழித்தொழிப்பதற்கான முயற்சிகளும் அதே வேகத்தில் நடைபெற்றன.

மேலப்பாளையம் ஆலிம்கள் நிறைந்த ஊர் என்பதால் அதன் வேகம் மற்ற இடங்களைக் காட்டிலும் சற்றுக் கடுமையாக இருந்தது. அதன் ஒரு கட்டமாக தவ்ஹீதை எதிர்க்கும் நோக்கத்தில் இங்கு 06.12.1988ல் புதுமனைப் பள்ளிவாசலில் மஜ்லிஸ் உலமா சார்பில், "மத்ஹபுகள் மாநாடு'' நடைபெற்றது. அம்மாநாட்டிற்கு ஸைபுத்தீன் ரஷாதி அழைக்கப்பட்டிருந்தார். அங்கு போய் தனது சவால் படலத்தை, சவடால் படலத்தை அரங்கேற்றத் தொடங்கினார்.

"எங்காவது பி.ஜே. சிக்குவான்னு எனக்கு ஆசை' என்று பேசினார். பேசி முடித்ததும் அப்போது தவ்ஹீது ஜமாஅத்தின் பொறுப்பில் இருந்தவர்கள் அவரைச் சுற்றி முகாமிட்டனர், முற்றுகையிட்டனர். அதன் பின்னர் கடிதப் போக்குவரத்திலேயே காலம் தள்ளிவிட்டு ஓட்டம் எடுத்தார். இதுபோன்று விருதுநகர், காயல்பட்டணம், திருச்சி என பல்வேறு ஊர்களில் சவடால் படலத்தை வெளியிட்டு, தப்பித்துக் கொண்டிருந்தார். கடைசியில் மரைக்காயர்பட்டிணத்தில் வசமாக மாட்டிக் கொண்டு திருச்சியில் விவாதத்தில் கலந்து கொண்டார்.

1988 முதல் சரியாக 25 ஆண்டுகள் கழித்து விவாதம் நடைபெற்றுள்ளது. பிப்ரவரி 2, 3, 4 ஆகிய தேதிகளில் திருச்சியில் நடைபெற்ற இந்த விவாதத்தில்

1. இஜ்மாஃ எனப்படும் ஏகோபித்த முடிவு மார்க்க ஆதாரமாகுமா?

2. மார்க்கத்தைச் சொல்வதில் பி.ஜே. பொய்யரா? ஸைபுத்தீன் பொய்யரா?

என்ற தலைப்புகளில் விவாதம் நடைபெற்றது.

இதில் முதல் தலைப்பான இஜ்மாஃ என்ற தலைப்பின் கீழ் முதல் நாளில் விவாதம் நடைபெற்றது. மீதி இரண்டு நாட்கள் இரண்டாவது தலைப்பில் விவாதம் நடந்தது.

இஜ்மாஃ என்ற தலைப்பில் பேசும் போது சகோதரர் பி.ஜே., வாதங்களை எடுத்து வைத்தார்.

உங்கள் இறைவனிடமிருந்து உங்களுக்கு அருளப்பட்டதையே பின்பற்றுங்கள்! அவனை விடுத்து (மற்றவர்களை) பொறுப்பாளர்களாக்கிப் பின்பற்றாதீர்கள்! குறைவாகவே படிப்பினை பெறுகிறீர்கள்!

அல்குர்ஆன் 7:3

"அல்லாஹ்வின் கருவூலங்கள் என்னிடம் உள்ளன; மறைவானதை அறிவேன்; என்று உங்களிடம் கூற மாட்டேன். நான் வானவர் என்றும் உங்களிடம் கூற மாட்டேன். எனக்கு அறிவிக்கப்படுவதைத் தவிர (வேறெதனையும்) நான் பின்பற்றுவதில்லை'' என்று (முஹம்மதே!) கூறுவீராக! "குருடனும், பார்வையுடையவனும் சமமாவார்களா? சிந்திக்க மாட்டீர்களா?'' என்று கேட்பீராக!

அல்குர்ஆன் 6:50

"இங்கிருந்து அனைவரும் இறங்கி விடுங்கள்! என்னிடமிருந்து உங்களுக்கு நேர்வழி வரும் போது எனது நேர்வழியைப் பின்பற்றுவோருக்கு எந்த அச்சமும் இல்லை. அவர்கள் கவலைப்படவும் மாட்டார்கள்'' என்று கூறினோம்.

அல்குர்ஆன் 2:38

"தூதர்களில் நான் புதியவன் அல்லன். எனக்கோ, உங்களுக்கோ என்ன செய்யப்படும் என்பதை அறிய மாட்டேன். எனக்கு அறிவிக்கப்படுவதைத் தவிர வேறு எதையும் நான் பின்பற்றவில்லை. நான் தெளிவாக எச்சரிக்கை செய்பவனே தவிர வேறில்லை'' எனக் கூறுவீராக!

அல்குர்ஆன் 46:9

இந்த வசனங்களை பி.ஜே. அவர்கள்  எடுத்துக் காட்டி, அல்லாஹ் தனது தூதருக்கு அருளிய வஹ்யீ என்ற தூதுச் செய்தியை மட்டும் தான் பின்பற்ற வேண்டும் என நெற்றியடி அடித்தார்.

இன்று உங்கள் மார்க்கத்தை உங்களுக்காக நிறைவு செய்து விட்டேன். எனது அருளை உங்களுக்கு முழுமைப்படுத்தி விட்டேன். இஸ்லாத்தை உங்களுக்கான வாழ்க்கை நெறியாக பொருந்திக் கொண்டேன். பாவம் செய்யும் நாட்டமில்லாமல், வறுமையின் காரணமாக நிர்பந்தத்துக்கு உள்ளானோரை அல்லாஹ் மன்னிப்பவன்; நிகரற்ற அன்புடையோன்.

அல்குர்ஆன் 5:3

இந்த வசனத்தை ஆதாரமாகக் காட்டி, மார்க்கம் முழுமையாக்கப்பட்ட பின் இந்த மார்க்கத்தில் மூக்கை நுழைக்க எந்தவொரு கொம்பனுக்கும் அதிகாரமில்லை. இஜ்மாஃ என்ற மூன்றாவது ஆதாரத்தை உள்ளே நுழைக்க எவருக்கும் அதிகாரமில்லை என்று ஆணித்தரமாக எடுத்துரைத்தார்.

இதற்குப் பதிலளிக்க முனைந்த ஸைபுத்தீன் ரஷாதி, இஜ்மாஃ என்பது இஸ்லாத்தின் மூல ஆதாரம் என்பதற்கு ஒரேயொரு குர்ஆன் வசனத்தையோ, நபி (ஸல்) அவர்களின் ஒரே ஒரு  ஹதீஸையோ ஆதாரமாகக் காட்டவே இல்லை. அவரால் காட்டவும் முடியாது. இஜ்மாஃவுக்கு ஆதாரம் குர்ஆனிலும் இல்லை, ஹதீஸிலும் இல்லை. அதனால் அவரது வாதத்திலும் ஆதாரம் எதுவும் இல்லை.

அல்குர்ஆன், ஹதீஸ் என்ற இரண்டு தான் மார்க்கத்தின் ஆதாரங்கள் என்பது நமது நிலைப்பாடு. இத்துடன் இஜ்மாஃ, கியாஸ் போன்றவை சேர்த்து நான்கு ஆதாரங்கள் என்பது சைபுத்தீனின் நிலைப்பாடு. ஆனால் இதற்கு அவர் குர்ஆன், ஹதீஸிலிருந்து எந்த ஆதாரத்தையும் சமர்ப்பிக்க இயலவில்லை. இந்த அடிப்படையில் அவர்களது முதல் தலைப்பு நிர்மூலமானது. அவரும் நிலைகுலைந்து, நீர்த்துப் போனார்.

அதுபோல் இரண்டாவது தலைப்பு தொடர்பான விவாதத்தில் ஸைபுத்தீன் ரஷாதி நபி (ஸல்) அவர்கள் மீது பொய்யான செய்திகளை இட்டுக்கட்டிக் கூறியிருப்பதை ஆதாரத்துடன் பி.ஜே. நிரூபித்தார்.

"நேர்மையான வியாபாரி இறைவனின் நேசத்திற்குரியவராவார்'' என்று நபிகள் நாயகம் கூறினார்கள் என ரஷாதி ஒரு பயானில் உரையாற்றிய வீடியோ கிளிப்பை விவாத அரங்கில் ஒளிபரப்பினோம்.

இது நபியின் மீது சொல்லப்பட்ட ரஷாதியின் திட்டமிட்ட பொய், இச்செய்தியை நபிகள் நாயகம் கூறியுள்ளார்களா? இந்த ஹதீஸ் (?) எந்த நூலில் உள்ளது? அதற்கான ஆதாரத்தைக் கொடுக்க முடியுமா? என்று பல முறை ரஷாதியிடத்தில் கேட்டும் இறுதி வரை அதற்கான எந்த ஆதாரத்தையும் நம்மிடம் அவர் அளிக்கவில்லை.

இதுபோல் நபிகள் நாயகம் (ஸல்) அவர்கள் பெயரால் அவர் இட்டுக்கட்டி பல்வேறு ஊர்களில் பேசி இருந்த வீடியோக்களைப் போட்டுக் காட்டி நபியின் பெயரால் திட்டமிட்டு பொய் சொன்னவர் தான் ஸைபுத்தீன் என்பதை பீஜே நிரூபித்தார். இந்த ஹதீஸ்கள் எந்த நூலில் உள்ளது என்று கேட்ட போது கடைசி வரை ஸைபுத்தீனால் பதில் சொல்ல முடியவில்லை. நபியின் பெயரால் துணிந்து பொய் சொல்லும் கேடுகெட்டவர் ஸைபுத்தீன் என்பது நிரூபணமானது.

அதேபோன்று விவாதக் களத்தில் பி.ஜே. எடுத்து வைத்த எந்த வாதத்திற்கும் உரிய பதிலை அவர் அளிக்காது வெளியிடங்களில் பயான் செய்வது போலவே அங்கேயும் சம்பந்தமில்லா தலைப்புகளில் பயான் செய்துக் கொண்டு இருந்தார்.

அவருடைய விவாத பயானுக்கிடையில், "யார் சத்தியத்தைச் சொல்லாது அமைதியாக இருக்கிறானோ அவன் ஊமை ஷைத்தான் ஆவான்' என நபிகள் நாயகம் கூறினார்கள்'' என புருடா விட்டார்.

இப்படி நபிகள் நாயகம் சொன்னதாக நிரூபிக்க முடியுமா? அதற்கான ஆதாரத்தை கொடுங்கள் என்று கேட்டோம். இதற்கும் எவ்வித ஆதாரத்தையும் இறுதி வரை அவர் தரவில்லை.

இப்படி நபி (ஸல்) அவர்கள் மீது துணிந்து பொய் சொன்னதை பி.ஜே. எடுத்துக் காட்டிய போதும் அதற்கு அவரிடமிருந்து மழுப்பல் தான் பதிலாக வந்தது.

உண்மையில் நபி (ஸல்) அவர்கள் மீது பொய் சொல்வதை விட மோசமான பொய் வேறெதுவும் இருக்க முடியாது.

அல்லாஹ்வின் தூதர் (ஸல்) அவர்கள் கூறினார்கள்:

என் மீது கூறும் பொய் (உங்களில்) ஒருவர் மீது கூறும் பொய்யைப் போன்றதன்று. யார் என் மீது வேண்டுமென்றே பொய்யுரைக்கின்றானோ அவன் தன் இருப்பிடத்தை நரகத்தில் ஆக்கிக்கொள்ளட்டும்.

அறிவிப்பவர்: முஃகீரா (ரலி),

நூல்: புகாரி 1291

நபி (ஸல்) அவர்கள் மீதே இந்த ஸைபுத்தீன் ரஷாதி பொய் சொல்கின்றார் என்றால் மார்க்கத்தில் பொய் சொல்பவர் இவர் தான் என்று பி.ஜே. தெளிவாக உறுதிப்படுத்தினார்; உண்மைப்படுத்தினார்.

இந்த அடிப்படையில் இரண்டாவது தலைப்பிலும் சத்தியமே வென்றது. இந்த உண்மையை, விவாத சிடிக்களைப் பார்ப்பவர்கள் தெளிவாக விளங்கிக் கொள்ளலாம்.

மொத்தத்தில் இந்த விவாதக் களத்தில் ஸைபுத்தீனின் முகத்திரையைக் கிழித்து சத்தியமே முத்திரை பதித்தது, அல்ஹம்துலில்லாஹ்.

தவ்ஹீத் ஜமாஅத் அறிஞர்கள் இஜ்மாஃ பற்றி அக்குவேறாக, ஆணிவேறாக ஆய்வு செய்து பார்த்துவிட்டு எள்ளளவு, எள்முனையளவு கூட ஆதாரமில்லை என்று தெரிந்து தான் இந்த உறுதியான நிலைப்பாட்டிற்கு வந்தனர். இருப்பினும் ஸைபுத்தீன் ஏதேனும் ஒரு ஆதாரத்தைத் தந்தால் நாம் மறுபரிசீலனை செய்யலாம் என்று பார்த்தோம்.

ஆனால் இவ்வளவு காலம் இவர்கள் கொடுத்த இந்தப் பூதாகரத் தோற்றம் இவரது வாதத்தின் மூலம் புஸ்வானமாகிப் போனது; பிசுபிசுத்துப் பூஜ்யமானது; நீறு பூத்து நீர்த்துப் போனது என்பதே உண்மை.

தொடர்: 3

நன்மைகளை வாரி வழங்கும் தொழுகை

அப்துந் நாசிர், கடையநல்லூர்

முந்தைய  இதழ்களில் தொழுகைக்காக உளூச் செய்தல், பல் துலக்குதல், உளூச் செய்த பின் ஓதும் துஆ, பாங்கு கூறுதல், பாங்கிற்குப் பின் ஓதும் துஆக்கள் ஆகிய காரியங்களில் எவ்வளவு நன்மைகள் புதைந்திருந்தன என்பதைப் பற்றி விரிவாகப் பார்த்தோம்.

அதன் தொடர்ச்சியாக தொழுகை என்ற வணக்கத்தை அடிப்படையாக வைத்து நாம் செய்யும் ஒவ்வொரு காரியத்திற்கும் அல்லாஹ் எப்படிப்பட்ட பாக்கியங்களை நமக்குத் தருகின்றான் என்பதை நாம் தொடர்ந்து காண்போம்.

தொழுகைக்கு முன்கூட்டியே வருவதன் சிறப்புகள்

ஐவேளைத் தொழுகைகளை நிறைவேற்றக் கூடிய பல சகோதரர்கள் ஒவ்வொரு தொழுகைக்கும் தாமதமாக வருவதை வழமையாகக் கொண்டுள்ளனர். பாங்கு சொல்லப்பட்ட பிறகும் இகாமத் சொல்லும் வரை வீணான காரியங்களிலும், தேவையற்ற பேச்சுக்களிலும் ஈடுபட்டுக் கொண்டிருப்பர். இகாமத் சொன்னவுடன் வேக, வேகமாக உளூச் செய்து விட்டு மூச்சிறைக்க தொழுகைக்கு ஓடிவருவார்கள்.

அதுமட்டுமில்லாமல் சில சகோதரர்கள் இகாமத் சொல்லப்பட்ட பிறகு தான் இயற்கைத் தேவைகளை நிறைவேற்றச் செல்வார்கள். அவர்கள் தங்களது இயற்கைத் தேவைகளை நிறைவேற்றி, பிறகு உளூச் செய்து விட்டு வருவதற்குள் தொழுகை முடிந்துவிடும். அல்லது இமாம் அத்தஹிய்யாத் அமர்வில் இருக்கும் போது தொழுகையில் வந்து இணைவார்கள்.

இது போன்ற வீணாண காரியங்களில் ஈடுபடுவதிலிருந்து நம்மை நாம் பாதுகாத்துக் கொள்வதற்கு முயற்சி செய்ய வேண்டும்.

தொழுகைக்கு முன்கூட்டியே நாம் தயாராவதால் ஏராளமான நன்மைகளை நாம் அடைகின்றோம். இது அல்லாஹ் நமக்குச் செய்த பாக்கியமாகும்.

தொழுகைக்கு நாம் முன்கூட்டியே வருவதால் எவ்வளவு நன்மைகளைப் பெறுகிறோம் என்பதை ஒவ்வொன்றாகக் காண்போம்.

நபியவர்களின் முன்மாதிரி

நபி (ஸல்) அவர்கள் பாங்கு சப்தத்தைக் கேட்டவுடன் தங்களுடைய வேலைகளையெல்லாம் ஒதுக்கி வைத்து விட்டு, தொழுகைக்காக பள்ளியை நோக்கி விரைந்து விடுவார்கள்.

அஸ்வத் பின் யஸீத் (ரஹ்) அவர்கள் அறிவிக்கிறார்கள்: நான் ஆயிஷா (ரலி) அவர்களிடம், "நபி (ஸல்) அவர்கள் வீட்டில் என்ன (வேலை) செய்து வந்தார்கள்?'' என்று கேட்டேன். அதற்கு ஆயிஷா (ரலி) அவர்கள், "நபி (ஸல்) அவர்கள் தம் வீட்டாருக்காக (வீட்டு) வேலைகளைச் செய்துவந்தார்கள். தொழுகை அறிவிப்பை (பாங்கு சப்தத்தை)ச் செவிமடுத்தால் (தொழுகைக்காகப்) புறப்பட்டு விடுவார்கள்'' என்று பதிலளித்தார்கள். 

(நூல்: புகாரி 5363)

முந்தி வருவதே மிகச் சிறந்தது

தொழுகைக்கு நாம் முன்கூட்டியே தயாராவதால் கிடைக்கும் நன்மைகளை அல்லாஹ் நம்முடைய கண்களுக்குக் காட்டவில்லை. அவ்வாறு காட்டினால் அதனை அடைவதற்காக மக்கள் ஒருவருக்கொருவர் போட்டியிடக்கூடிய நிலை உருவாகிவிடும்.

அல்லாஹ்வின் தூதர் (ஸல்) அவர்கள் கூறினார்கள்: தொழுகைக்கு அதன் ஆரம்ப வேளையில் விரைந்து செல்வதில் உள்ள நன்மையை மக்கள் அறிவார்களாயின் அதற்கு முந்திக் கொள்வார்கள்.

அறிவிப்பவர்: அபூஹுரைரா (ரலி),

நூல்:  புகாரி (615)

இப்படிப்பட்ட மாபெரும் பாக்கியத்தை தொழுகையாளிகள் தான் பெறமுடியும் என்பதை நாம் விளங்கிக் கொள்ள வேண்டும். தொழுகையைப் பேணாதவர்கள் ஒருபோதும் இது போன்ற நற்பாக்கியங்களை அடைந்து கொள்ள முடியாது.

பள்ளியை நோக்கும் உள்ளமும் - அர்ஷின் நிழலும்

மறுமை நாளின் வெப்பத்தின் கொடுமை மிகக் கடுமையானதாகும். அல்லாஹ்வுடைய அர்ஷின் நிழலைத் தவிர வேறு நிழல் அந்நாளில் இருக்காது. அப்போது பள்ளிவாசலோடு தொடர்பு கொண்ட உள்ளத்தை உடையவர்களுக்கு அல்லாஹ் தன்னுடைய அர்ஷின் கீழ் நிழல் கொடுக்கின்றான்.

ஒருவர் ஒவ்வொரு தொழுகைக்கும் முன்கூட்டியே பள்ளிவாசலுக்கு வருவது அவரை இத்தகைய பாக்கியத்தைப் பெறக்கூடியவராக ஆக்கும் என்பதில் எள்ளவும் சந்தேகமில்லை.

நபி (ஸல்) அவர்கள் கூறினார்கள்: அல்லாஹ் தனது (அரியணையின்) நிழலைத் தவிர வேறு நிழலே இல்லாத (மறுமை) நாளில் ஏழு பேருக்கு நிழல் (அடைக்கலம்) அளிப்பான்:

1. நீதி மிக்க ஆட்சியாளர்.

2. இறை வணக்கத்திலேயே வளர்ந்த இளைஞன்.

3. பள்ளிவாசல்களுடன் (எப்போதும்) தொடர்பு வைத்துக் கொள்ளும் இதயமுடையவர்.

4. அல்லாஹ்வுக்காகவே நட்புக் கொண்டு அந்த நிலையிலேயே (இவ்வுலகிலிருந்து) பிரிந்து சென்ற இருவர்.

5. அந்தஸ்தும் அழகும் உள்ள ஒரு பெண் தம்மை தவறு செய்ய அழைத்த போதும் நான் அல்லாஹ்வுக்கு அஞ்சுகிறேன் என்று கூறியவர். 

6. தமது வலக் கரம் செய்த தர்மத்தை இடக் கரம்கூட அறியாத வகையில் இரகசியமாக தர்மம் செய்தவர்.

7. தனிமையில் அல்லாஹ்வை நினைவு கூர்ந்து (அவனது அச்சத்தால்) கண்ணீர் வடித்தவர்.

அறிவிப்பவர்: அபூஹுரைரா (ரலி)

நூல்:  புகாரி (660)

முஸ்லிமுடைய அறிவிப்பில் பின்வருமாறு இடம் பெற்றுள்ளது.

"பள்ளிவாசலிலிருந்து புறப்பட்டுச் சென்றாலும் திரும்பி வரும்வரை அதனுடனேயே தொடர்பு வைத்துக்கொள்ளும் இதயமுடையவர்''

நூல்: முஸ்லிம் (1869)

முன்கூட்டி வருவது நிதானத்தைப் பெற்றுத் தரும்

தொழுகைக்கு மிக மிக முக்கியமானது நிதானமாகும். இதனை நபியவர்கள் மிகவும் வலியுறுத்தியுள்ளார்கள்.

அல்லாஹ்வின் தூதர் (ஸல்) அவர்கள் கூறினார்கள்:  தொழுகைக்காக இகாமத் சொல்லப்பட்டால் தொழுகைக்கு ஓடிச் செல்லாதீர்கள்; நடந்தே செல்லுங்கள்; நிதானத்தைக் கடைப்பிடியுங்கள். உங்களுக்குக் கிடைத்த (ரக்அத்)தை (இமாமுடன்) தொழுங்கள்; தவறிப்போனதை (பின்னர் எழுந்து) நிறைவு செய்துகொள்ளுங்கள்.

அறிவிப்பவர்: அபூஹுரைரா (ரலி)

நூல்: முஸ்லிம் (1053)

தொழுகைக்கு முன்கூட்டியே வருவதால் நாம் அமைதியாகவும், நிதானமாகவும் தொழுகின்ற பாக்கியத்தைப் பெறுகின்றோம். சில சகோதரர்கள் தாமதமாக வருவதால் இமாம் ஜமாஅத்தை அடைவதற்காக வேக, வேகமாக உளூச் செய்து விட்டு மூச்சிறைக்க ஓடிவந்து தொழுகையில் இணைகின்றனர். இது தொழுகைக்கு இருக்க வேண்டிய அமைதியையும், நிதானத்தையும் இல்லாமல் ஆக்கி விடுகின்றது. தொழுகைக்கு முன்கூட்டியே வருவதால் இதுபோன்ற நிலைகளை விட்டும் நாம் தவிர்ந்து கொள்ளலாம்.

முன்கூட்டி வருவதால் கிடைக்கும் பாக்கியங்களின் தொகுப்பு

ந நபியவர்கள் பாங்கு சொன்னவுடன் வீட்டிலிருந்து தொழுகைக்குப் புறப்பட்டுவிடுவார்கள் என்ற ஹதீஸின் மூலம் இது மிகச் சிறந்த நற்செயல் என்பதை நாம் அறிகிறோம்.

ந தொழுகைக்கு ஆரம்ப வேளையில் வருவதன் நன்மைகளை மக்கள் அறிந்தால் அந்த நன்மைகளை அடைவதற்குப் போட்டியிடுவார்கள்.

ந தொழுகைக்கு முன்கூட்டியே வருவதால் பள்ளிவாசலோடு தொடர்பு கொண்ட உள்ளத்தைப் பெற்றவராகிவிடுகிறார். இதன் காரணமாக மறுமையில் அர்ஷின் நிழலைப் பெறும் பாக்கியம் கிடைக்கிறது.

ந தொழுகையில் நிதானம், அமைதி மிகவும் அவசியமாகும். முன்கூட்டியே வருவதன் மூலம் இதனை நாம் அடைந்து கொள்ளலாம்.

தொழுகைக்கு முன்கூட்டியே வருவதால் இன்னும் ஏராளமான பாக்கியங்களை  பெறமுடியும். அவற்றை இன்ஷா அல்லாஹ் பின்னர் விரிவாகக் காண்போம்.

தொழுகைக்காகக் காத்திருப்பதன் சிறப்புகள்

தொழுகையாளிகள் தொழுகைக்காகக் காத்திருக்கும் போது அதற்காக அல்லாஹ் ஏராளமான நன்மைகளை வாரி வழங்குகிறான். அல்லாஹ் எப்படிப்பட்ட கருணையாளன் என்பதற்கும், தொழுகை எவ்வளவு பெரிய நல்லமல் என்பதற்கும் இது மாபெரும் சான்றாகும்.

பள்ளிவாசலுக்கு முன்கூட்டியே சென்று தொழுகைக்காகக் காத்திருப்பதற்கும், அதுபோன்று ஒரு தொழுகையை முடித்து விட்டு மற்றொரு தொழுகைக்காகக் காத்திருப்பதற்கும் ஏராளமான நன்மைகளை அல்லாஹ் வாரி வழங்குகிறான். அது பற்றிய நபிமொழிகளைக் காண்போம்.

தொழுகையை எதிர்பார்த்து தூங்கினாலும் நன்மையே!

அனஸ் (ரலி) அவர்கள் அறிவிக்கிறார்கள்: நபி (ஸல்) அவர்கள் ஓர் இரவில் இஷாத் தொழுகையைப் பாதி இரவு வரை தாமதப்படுத்தினார்கள். (பின்னர் தொழுவித்தார்கள்.) பிறகு அவர்கள் எங்களை நோக்கித் திரும்பினார்கள். அவர்களுடைய மோதிரம் மின்னுவதை இப்போதும் நான் பார்ப்பது போன்றுள்ளது. அப்போது நபி (ஸல்) அவர்கள், "மக்கள் தொழுதுவிட்டு உறங்கிவிட்டார்கள். (ஆனால், நீங்கள் இவ்வளவு நேரம் காத்திருந்து தொழுதிருக்கிறீர்கள்.) நீங்கள் ஒரு தொழுகையை எதிர்பார்த்துக் காத்திருக்கும் வரை அந்தத் தொழுகையிலேயே உள்ளீர்கள். (அதுவரை அதன் நன்மை உங்களுக்குக் கிடைத்துக் கொண்டேயிருக்கும்)'' என்று சொன்னார்கள்.

நூல்: புகாரி (5869)

ஒரு தொழுகையை எதிர்பார்த்து நாம் தூங்கிவிட்டாலும் கூட இறைவன் தூங்கிய நேரம் முழுவதையும் தொழுகையாகவே பதிவு செய்கிறான் என்றால் தொழுகையாளிகளுக்கு இறைவன் வழங்கும் பாக்கியம் எப்படிப்பட்டது என்பதை நாம் விளங்கிக் கொள்ள முடிகிறது. இவற்றையெல்லாம் தெரிந்த பிறகும் அறவே தொழுகையைப் புறக்கணிக்கிறார்களே! அந்த மக்களின் துர்பாக்கியத்தை நாம் என்னவென்பது?

மலக்குமார்களின் பிரார்த்தனை

அல்லாஹ்வின் தூதர் (ஸல்) அவர்கள் கூறினார்கள்: உங்களில் ஒருவர் தாம் தொழுத இடத்தில் (கூட்டுத் தொழுகையை எதிர்பார்த்து) இருக்கும் வரை அவருக்காக வானவர்கள் பிராத்தித்துக் கொண்டிருக்கிறார்கள். அவருக்கு சிறுதுடக்கு ஏற்படாதவரை (பிராத்திக்கிறார்கள்). இறைவா! இவருக்கு மன்னிப்பளிப்பாயாக! இறைவா! இவருக்கு கருணைபுரிவாயாக! என்று கூறுகின்றனர்.

தொழுகையானது, ஒருவரைத் தம் குடும்பத்தாரிடம் செல்லவிடாமல் தடுத்து நிறுத்தியிருக்குமானால் அவ்வாறு அவரைத் தொழுகை நிறுத்தியிருக்கும் வரை அவர் தொழுகையில் இருப்பதாகவே கருதப்படுவார்.

அறிவிப்பவர்:  அபூஹுரைரா (ரலி)

நூல்: புகாரி (659)

மலக்குமார்கள் பாவமே அறியாதவர்கள். அவர்களின் பிரார்த்தனை கண்டிப்பாக அல்லாஹ்வால் ஏற்றுக்கொள்ளப்படும். தொழுகையாளிகள் தான் இத்தகைய பாக்கியங்களை அடைந்து கொள்ள முடியும்.

பாவங்கள் அழிக்கப்பட்டு, அந்தஸ்துகள் உயர்த்தப்படுதல்

அபூஹுரைரா (ரலி) அவர்கள் கூறியதாவது: (ஒரு முறை) அல்லாஹ்வின் தூதர் (ஸல்) அவர்கள், "(உங்கள்) தவறுகளை அல்லாஹ் மன்னித்து, தகுதிகளை உயர்த்தும் செயல்கள் சிலவற்றை உங்களுக்கு நான் சொல்லட்டுமா?'' என்று கேட்டார்கள். மக்கள், "ஆம்; (சொல்லுங்கள்) அல்லாஹ்வின் தூதரே!'' என்று கூறினர். அல்லாஹ்வின் தூதர் (ஸல்) அவர்கள், "(அவை:) சிரமமான சூழ்நிலைகளிலும் அங்கத் தூய்மையை முழுமையாகச் செய்வதும், பள்ளிவாசல்களை நோக்கி அதிகமான காலடிகளை எடுத்து வைத்துச் செல்வதும், ஒரு தொழுகைக்குப் பின் அடுத்த தொழுகையை எதிர்பார்த்துக் காத்திருப்பதும் ஆகும். இவைதாம் கட்டுப்பாடுகளாகும்'' என்று கூறினார்கள். 

(நூல்: முஸ்லிம் 421)

மேற்கண்ட நபிமொழிகளிலிருந்து தொழுகைக்காக நாம் காத்திருப்பதால் கிடைக்கும் பயன்களை வரிசையாகக் காண்போம்.

ந ஒருவர் தொழுகையை எதிர்பார்த்துக் காத்திருந்தால் அவர் தூங்கிவிட்டாலும் அவர் தொழுகையில் இருப்பவராகவே கருதப்படுவார்.

ந ஒருவர் தொழுது விட்டு அதே இடத்தில் மற்றொரு தொழுகையை எதிர்பார்த்து காத்திருந்தால் அவரது உளூ நீங்காத வரை அல்லது அவர் அந்த இடத்தை விட்டு நகரும் வரை மலக்குமார்கள் அவருக்காகப் பிரார்த்தனை செய்கிறார்கள்; பாவமன்னிப்புக் கோருகிறார்கள்.

ந தொழுகைக்காகக் காத்திருப்பது நம்முடைய பாவங்களை அழித்து நன்மைகளை உயர்த்தும் நல்லறமாகும்.

தொழுகைக்காக நடந்து செல்வதன் சிறப்புகள்

தொழுகையை முறையாக பேணித் தொழுபவர்கள் அதன் மூலம் ஏராளமான நற்பாக்கியங்களை அடைந்து கொள்கின்றனர். அந்த நற்பாக்கியங்களில் ஒன்று தான் தொழுகையை நிறைவேற்றுவதற்காக நடந்து வருபவர்கள் பெறும் நன்மைகள். இதற்கு எத்தகைய பாக்கியங்களை நபிகள் நாயகம் (ஸல்) அவர்கள் நமக்கு வழிகாட்டிச் சென்றுள்ளார்கள் என்பதைக் காண்போம்.

தொலைவிலிருந்து நடந்து வருபவருக்கு அதிக நன்மை

பள்ளிவாசல் தூரமாக இருந்தால் தொழுகைக்குச் செல்வதற்கு சோம்பல் கொண்டு பல சகோதரர்கள் வீட்டிலேயே தொழுது விடுகின்றனர். இதனை நாம் தவிர்ந்து கொள்ள வேண்டும்.

நம்முடைய வீட்டிலிருந்து பள்ளிவாசல் வெகு தொலைவில் இருந்தாலும் நாம் பள்ளியை நாடிச் சென்று தொழுகையை நிறைவேற்றினால் ஏராளமான நன்மைகளை அல்லாஹ் நமக்கு வாரி வழங்குகிறான்.

அதிலும் குறிப்பாக இன்று பல பள்ளிவாசல்களில் இணை கற்பிக்கின்ற காரியங்கள் அரங்கேற்றப்படுகின்றன. இத்தகைய பள்ளிவாசல்கள் தொழுவதற்கே தகுதியற்ற பள்ளிவாசல்களாகும்.

இணை வைப்புக் காரியங்கள் அரங்கேறாத தவ்ஹீத் பள்ளிவாசல்கள் வெகு தொலைவில் இருந்தாலும் நாம் நாடிச் சென்று அங்கு நம்முடைய தொழுகைகளை நிறைவேற்றும் போது நாம் இந்த நன்மைகளை அடைந்து கொள்ள முடியும்.

அல்லாஹ்வின் தூதர் (ஸல்) அவர்கள் கூறினார்கள்: மக்களில் தொழுகைக்காக அதிக நன்மை பெறுகின்றவர் (யாரெனில்), (தொழுகைக்காக) வெகு தொலைவிலிருந்து நடந்துவருபவர் ஆவார். அடுத்து அதற்கடுத்த தொலை தூரத்திலிருந்து வருபவர் ஆவார். யார் இமாமுடன் ஜமாஅத்தாகத் தொழக் காத்திருக்கிறாரோ அவர், (தனியாகத்) தொழுதுவிட்டு உறங்கி விடுபவரை விட அதிக நன்மை அடைபவராவார்.

அறிவிப்பவர்: அபூமூசா (ரலி),

நூல்: முஸ்லிம் (1179)

தொழுகையாளிகள் தான் இத்தகைய பாக்கியங்களை அடைந்து கொள்ள முடியும்.

சொர்க்கத்தில் மாளிகை கட்டப்படும்

தொழுகைக்காக ஒவ்வொரு முறை நாம் பள்ளியை நோக்கிச் செல்லும் போதும் அல்லாஹ் சொர்க்கத்தில் ஒரு மாளிகையைத் தயார் செய்கின்றான்.

சுப்ஹானல்லாஹ்! தொழுகை நமக்கு எவ்வளவு பெரிய பாக்கியங்களையெல்லாம் பெற்றுத் தருகிறது.

அல்லாஹ்வின் தூதர் (ஸல்) அவர்கள் கூறினார்கள்: ஒருவர் பள்ளிவாசலுக்குக் காலையிலோ மாலையிலோ சென்று வந்தால் அவர் ஒவ்வொரு முறை சென்று வரும்போதும் அவருக்காக அல்லாஹ் சொர்க்கத்தில் ஒரு மாளிகையை (அல்லது விருந்தை)த் தயார் செய்கிறான்.

அறிவிப்பவர்:  அபூஹுரைரா (ரலி)

நூல்: முஸ்லிம் (1187)

அறவே தொழுகையை நிறைவேற்றாமல் இருப்பவர்களும், தொழுகை விஷயத்தில் பொடும்போக்காக இருப்பவர்களும் இத்தகைய பாக்கியங்களை எப்படி அடைந்து கொள்ள முடியும்?

தொழுகைக்காக நாம் எடுத்து வைக்கும் ஒவ்வொரு எட்டிற்கும் எத்தகைய பாக்கியங்களை அல்லாஹ் வழங்குகிறான் என்பதைப் பின்வரும் நபிமொழிகள் நமக்குத் தெளிவாகப் படம் பிடித்துக் காட்டுகின்றன.

ஒவ்வொரு எட்டிற்கும் பத்து நன்மைகள்

நபி (ஸல்) அவர்கள் கூறினார்கள்: ஒரு மனிதர் அங்கத் தூய்மை செய்து விட்டு பிறகு தொழுகை நிறைவேற்றுவதற்காக பள்ளிவாசலுக்கு வந்தால் அவன் பள்ளிவாசலை நோக்கி எடுத்து வைக்கும் ஒவ்வொரு எட்டிற்காகவும் பத்து நன்மைகளை அவனுடைய இரண்டு எழுத்தர்களும் பதிவு செய்கிறார்கள்.

அறிவிப்பவர்: உக்பா பின் ஆமிர் (ரலி),

நூல்: இப்னு ஹிப்பான் (2045)

எடுத்து வைக்கும் ஒவ்வொரு எட்டும் தர்மமாகும்

அல்லாஹ்வின் தூதர் (ஸல்) அவர்கள் கூறினார்கள்: மனிதனின் (உடலிலுள்ள) ஒவ்வொரு மூட்டிற்காகவும் ஒவ்வொரு நாளும் தர்மம் செய்வது கடமையாகும். ஒருவருக்கு அவரது வாகனத்தில் ஏறிட உதவுவது, அல்லது அவரது வாகனத்தின் மீது அவரது மூட்டை முடிச்சுகளை ஏற்றி வைப்பதும் தர்மமாகும். நல்ல சொல்லும் தொழுகைக்கு நடந்து செல்ல எடுத்து வைக்கும் ஒவ்வோர் அடியும், (வழியறியாமல் தடுமாறும் ஒருவருக்குச் சரியான) பாதையை அறிவித்துத் தருவதும் தர்மமாகும்.

அறிவிப்பவர்: அபூஹுரைரா (ரலி)

நூல்: புகாரி (2891)

பாவங்கள் அழிக்கப்பட்டு, தகுதிகள் உயர்த்தப்படுதல்

அல்லாஹ்வின் தூதர் (ஸல்) அவர்கள் கூறினார்கள்: யார் தமது வீட்டிலேயே அங்கத் தூய்மை (உளூ) செய்துவிட்டு இறைக் கட்டளை(களான தொழுகை)களில் ஒன்றை நிறைவேற்றுவதற்காக இறையில்லங்களில் ஒன்றை நோக்கி நடந்து செல்கிறாரோ, (அவர் எடுத்துவைக்கும்) இரு காலடிகளில் ஒன்று அவருடைய தவறுகளில் ஒன்றை அழித்துவிடுகிறது; மற்றொன்று அவருடைய தகுதியை உயர்த்திவிடுகிறது.

அறிவிப்பவர்: அபூஹுரைரா (ரலி),

நூல்: முஸ்லிம் (1184)

அபூஹுரைரா (ரலி) அவர்கள் கூறியதாவது: (ஒரு முறை) அல்லாஹ்வின் தூதர் (ஸல்) அவர்கள், "(உங்கள்) தவறுகளை அல்லாஹ் மன்னித்து, தகுதிகளை உயர்த்தும் செயல்கள் சிலவற்றை உங்களுக்கு நான் சொல்லட்டுமா?'' என்று கேட்டார்கள். மக்கள், "ஆம்; (சொல்லுங்கள்) அல்லாஹ்வின் தூதரே!'' என்று கூறினர். அல்லாஹ்வின் தூதர் (ஸல்) அவர்கள், "(அவை:) சிரமமான சூழ்நிலைகளிலும் அங்கத் தூய்மையை முழுமையாகச் செய்வதும், பள்ளிவாசல்களை நோக்கி அதிகமான காலடிகளை எடுத்து வைத்துச் செல்வதும், ஒரு தொழுகைக்குப் பின் அடுத்த தொழுகையை எதிர்பார்த்துக் காத்திருப்பதும் ஆகும். இவைதாம் கட்டுப்பாடுகளாகும்'' என்று கூறினார்கள். 

(நூல்: முஸ்லிம் 421)

வாகனத்தில் வருவதை விட நடந்து வருவது சிறப்பு

உபை பின் கஅப் (ரலி) அவர்கள் அறிவிக்கிறார்கள்: அன்சாரிகளில் ஒருவருடைய வீடு மதீனாவிலேயே (பள்ளிவாசலுக்கு) வெகு தொலைவில் அமைந்திருந்தது. அவர் அல்லாஹ்வின் தூதர் (ஸல்) அவர்களுடன் எல்லாத் தொழுகைகளிலும் தவறாமல் கலந்துகொள்வார். நாங்கள் அவருக்காக (வெகு தொலைவிலிருந்து சிரமப்பட்டு வருகிறாரே என்று) அனுதாபப்பட்டோம். இதையடுத்து அவரிடம் நான், "இன்னாரே! நீங்கள் கழுதையொன்றை வாங்கி (அதில் பயணம் செய்து வருவீரா)னால் நன்றாயிருக்குமே! கடும் வெப்பத்திலிருந்தும் விஷ ஜந்துக்களிலிருந்தும் உங்களைக் காத்துக் கொள்ளலாமே?'' என்று கேட்டேன். அதற்கு அவர், "அறிந்து கொள்ளுங்கள். அல்லாஹ்வின் மீதாணையாக! எனது இல்லம் அல்லாஹ்வின் தூதர் (ஸல்) அவர்களுடைய இல்லத்துடன் (மஸ்ஜிதுந் நபவீ அருகிலேயே கயிறுகளால் இணைத்துக்) கட்டப்பட்டிருக்க வேண்டும் என நான் விரும்பவில்லை'' என்று கூறினார். அவர் அவ்வாறு கூறியது எனக்கு மிகுந்த மன வேதனையளிக்கவே நான் நபி (ஸல்) அவர்களிடம் வந்து நடந்ததைத் தெரிவித்தேன். நபி (ஸல்) அவர்கள் அவரை அழைத்(து விசாரித்)தார்கள். அவர் முன்பு (என்னிடம்) கூறியதைப் போன்றே  கூறினார். மேலும், தம் கால் சுவடுகளுக்கு நன்மை பதிவு செய்யப்பட வேண்டுமெனத் தாம் விரும்புவதாகவும் அவர் தெரிவித்தார். நபி (ஸல்) அவர்கள், "நீங்கள் எதிர்பார்த்த நன்மை உங்களுக்கு உண்டு'' என்று கூறினார்கள். 

(நூல்: முஸ்லிம் 1180)

"நான் பள்ளிவாசலுக்கு நடந்துவருவதும் (பள்ளிவாசலில் இருந்து) இல்லத்தாரிடம் திரும்பிச் செல்வதும் எனக்கு (நன்மைகளாக)ப் பதிவு செய்யப்பட வேண்டுமென நான் விரும்புகிறேன்'' என்று அந்த மனிதர் கூறியதாகவும் அப்போது அல்லாஹ்வின் தூதர் (ஸல்) அவர்கள், "இவை அனைத்தையும் சேர்த்து அல்லாஹ் உங்களுக்கு வழங்கிவிட்டான்'' என்று கூறியதாகவும் முஸ்லிமின் மற்றொரு அறிவிப்பில் இடம் பெற்றுள்ளது.

ஒவ்வொரு காலடிக்கும் ஒரு அந்தஸ்து

ஜாபிர் பின் அப்தில்லாஹ் (ரலி) அவர்கள் அறிவிக்கிறார்கள்: எங்கள் குடியிருப்புகள் (மஸ்ஜிதுந் நபவீ) பள்ளிவாசலுக்குத் தொலைவில் அமைந்திருந்தன. ஆகவே, நாங்கள் எங்கள் வீடுகளை விற்றுவிட்டுப் பள்ளிவாசலுக்கு அருகில் குடியேற விரும்பினோம். அப்போது அல்லாஹ்வின் தூதர் (ஸல்) அவர்கள் அவ்வாறு செய்ய வேண்டாமென எங்களுக்குத் தடை விதித்தார்கள். மேலும், "உங்களது ஒவ்வொரு காலடிக்கும் உங்களுக்கு ஒரு தகுதி உண்டு'' என்று கூறினார்கள். 

(நூல்: முஸ்லிம் 1181)

காலடிகள் பதிவு செய்யப்படும்

ஜாபிர் பின் அப்தில்லாஹ் (ரலி) அவர்கள் அறிவிக்கிறார்கள் : (மஸ்ஜிதுந் நபவீ) பள்ளிவாசலைச் சுற்றி காலி மனைகள் இருந்தன. பனூசலிமா குலத்தார் பள்ளிவாசலுக்கு அருகிலேயே குடியேற விரும்பினர். இந்த விஷயம் அல்லாஹ்வின் தூதர் (ஸல்) அவர்களுக்கு எட்டியபோது அவர்கள், "நீங்கள் (மஸ்ஜிதுந் நபவீ) பள்ளிவாசலுக்கு அருகில் குடியேறப்போவதாக நான் அறிந்தேனே (அது உண்மையா)?'' என்று கேட்டார்கள். அதற்கு பனூசலிமா குலத்தார் "ஆம், அல்லாஹ்வின் தூதரே! நாங்கள் அவ்வாறு விரும்பினோம்'' என்று கூறினார்கள். அப்போது அல்லாஹ்வின் தூதர் (ஸல்) அவர்கள், "பனூசலிமா குலத்தாரே! உங்கள் குடியிருப்புகள் அங்கேயே இருக்கட்டும்! உங்கள் காலடிகள் (அளவுக்கு நன்மைகள்) பதிவு செய்யப்படும்; உங்கள் குடியிருப்புகள் அங்கேயே இருக்கட்டும்! உங்கள் காலடிகள் (அளவுக்கு நன்மைகள்) பதிவு செய்யப்படும்'' என்று (இரு முறை) கூறினார்கள்.

நூல்: முஸ்லிம் (1182)

தொழுகைக்காக நடந்து வருவதால் கிடைக்கும் பாக்கியங்களின் தொகுப்பு

ந தொழுகைக்காக வெகுதொலைவிலிருந்து நடந்து வருபவர் தான் அதிக நன்மைகளைப் பெறுபவராவார்.

ந காலையிலோ, அல்லது மாலையிலோ பள்ளிவாசலுக்குச் சென்றால் ஒவ்வொரு தடவை செல்லும் போதும் சொர்க்கத்தில் ஒரு மாளிகையை அல்லாஹ் தயார் செய்கின்றான்.

ந வீட்டில் உளூச் செய்து பள்ளிவாசலை நோக்கி எடுத்து வைக்கப்படும் ஒவ்வொரு எட்டிற்கும் பத்து நன்மைகளை அல்லாஹ் வழங்குகிறான்.

ந தொழுகைக்காக எடுத்து வைக்கும் ஒவ்வொரு எட்டும் தர்மமாகும்.

ந வீட்டில் உளூச் செய்து தொழுகைக்காக நடந்து சென்றால் ஒரு எட்டு பாவங்களை அழிக்கிறது. மற்றொரு எட்டு அந்தஸ்துகளை உயர்த்துகிறது.

ந பள்ளிவாசலை நோக்கி அதிகமான காலடிகள் எடுத்து வைத்துச் செல்வது நமது பாவங்களை அழித்து நன்மைகளை உயர்த்துகிறது.

ந நம்முடைய கால் சுவடுகள் பதிவு செய்யப்படுவதுடன் ஒவ்வொரு எட்டிற்கும் ஒரு அந்தஸ்து கிடைக்கிறது.

தொழுகை அதனை முறையாகப் பேணுபவர்களுக்கு இன்னும் பல்வேறு பாக்கியங்களை வாரி வழங்குகிறது. அவற்றை வரும் இதழ்களில் விரிவாகக் காண்போம்.

வளரும் இன்ஷா அல்லாஹ்

அப்சல்குரு தூக்கு அப்பட்டமான சட்டமீறல்

(இந்தக் கட்டுரை, அப்சல் குருவுக்கு வழங்கப்பட்ட தூக்குத் தண்டனையை விமர்சித்து டி.ஆர். அந்தியார்ஜுனா அவர்கள் எழுதிய கட்டுரையின் தமிழாக்கமாகும். கட்டுரையாளர் உச்ச நீதிமன்றத்தின் மூத்த வழக்கறிஞரும் மத்திய அரசாங்கத்தின் முன்னாள் சொலிஸிட்டர் ஜெனரலும் ஆவார். இவரின் கட்டுரை பிப்ரவரி 19, 2013 இந்து நாளேட்டில் வெளியானது.)

பிப்ரவரி 9, 2013 அன்று மத்திய அரசாங்கத்தால் நிறைவேற்றப்பட்ட அப்சல் குருவின் மரண தண்டனை காட்டுமிராண்டித்தனமான செயல் ஆகும். ஆகஸ்ட் 4, 2005ம் ஆண்டு அப்சல் குருவுக்கு உச்ச நீதிமன்றம் மரண தண்டனை விதித்தது.  இதன் பின்னர் அவர் நவம்பர் 8, 2006ல் குடியரசு தலைவருக்கு கருணை மனு அனுப்பியிருந்தார். ஏழு வருடங்கள் அவருடைய கருணை மனு கண்டு கொள்ளப்படாமல் கிடப்பில் கிடந்தது. இப்போது அது மறுக்கப்பட்டு தண்டனை நிறைவேற்றப்பட்டது.

தனக்கு வாழ்வா? சாவா என்று எந்த ஒரு முடிவும் தெரியாமல் அவர் மட்டுமல்ல அவரது குடும்பமும் கடுந்துயருக்கும் கவலைக்கும் ஆளாயினர். தூக்குத் தண்டனை கைதிகளும், அவர்களது குடும்பத்தாரும் படுகின்ற அவஸ்தை, அல்லல் காரணமாக நாகரிகமான நாடுகளும் நமது நாட்டின் உச்ச நீதிமன்றத்தை மிகக் கடுமையாகக் கண்டிக்கின்றன.

ஏழாண்டுகள் கழித்து பிப்ரவரி 3 அன்று குடியரசுத் தலைவர் கருணை மனுவை மறுத்த இந்த விபரம் இரகசியமாகவே வைக்கப்பட்டது. அவருடைய குடும்பத்தாருக்கும் தெரிவிக்காமல் மறைக்கப்பட்டது. இது போன்ற கால தாமதமான வழக்குகள் நீதிமன்றத்தின் கவனத்தில் கொள்ளப்பட்டு மரண தண்டனையிலிருந்து காக்கப்பட்ட வழக்குகள் உள்ளன.

அப்படி அப்சல் குருவின் வழக்கு நீதிமன்றத்தின் கவனத்திற்கு வந்து அவர் தப்பி விடக்கூடாது என்பதற்காகவே திட்டமிட்டு இது மறைக்கப்பட்டது. அப்சல் குருவின் குடும்பத்திற்குக் கூடத் தெரிவிக்காமல் கருணை மனு மறைக்கப்பட்ட ஒரு சில நாட்களுக்குள்ளாக பிப்ரவரி 9ம் தேதி அன்று அவருக்குத் தூக்குத் தண்டனை இரகசியமாக நிறைவேற்றப்பட்டது. அது இரகசியமாக திஹார் சிறையிலேயே உடல் அடக்கமும் செய்யப்பட்டது.

மறுக்கப்பட்ட உரிமை

தண்டனையைக் குறைக்க வேண்டும் அல்லது தள்ளுபடி செய்ய வேண்டும் என்று குடியரசுத் தலைவரிடம் மனு செய்வது அரசியல் சட்டம் பிரிவு 72ன் படி ஒரு தண்டனைக் கைதியின் உரிமையாகும். அந்த மனு மறுக்கப்படுகின்ற வரை அரசாங்கம் தண்டனையை நிறைவேற்றக்கூடாது.

மனுவை முடிவு செய்வதில், பிரிவு 72ன் படி குடியரசுத் தலைவர் தனது தனி அதிகாரத்தைப் பயன்படுத்தாமல் அரசாங்கத்தின் அறிவுரைப்படியே நடக்க வேண்டும். 1989ஆம் ஆண்டு கெஹார் சிங்க் வழக்கில் உச்ச நீதிமன்றம் இவ்வாறு தான் தீர்ப்பு அளித்தது.

அப்சல் குரு வழக்கில் எழக்கூடிய முக்கியமான கேள்வி, அவர் கருணை மனுவைச் சமர்ப்பித்து ஏழு ஆண்டுகள் ஆகிவிட்டன. இவ்வளவு நீண்ட கால தாமதத்திற்குப் பிறகு அவருக்கு எப்படி தூக்குத் தண்டனை நிறைவேற்ற முடியும் என்பது தான். அப்சல் குருவின் கருணை மனு அரசியலாக்கப்பட்டு விட்டது.

வருகின்ற நாடாளுமன்ற தேர்தலில் அதை ஒரு பிரச்சனையாக ஆக்கி பிஜேபி அரசியல் ஆதாயம் தேட முனைந்து விட்டது. அதனால் அது மிக அற்பத்தனமாக வலுக்கட்டாயமாக அப்சல் குருவுக்கு மரண தண்டனை நிறைவேற்றக் கோரி தொடர்ந்து வலியுறுத்திக் கொண்டே இருந்தது.

அப்சல் குரு மரணத்தில் பிஜேபி அரசியல் ஆதாயம் பார்த்து விடக்கூடாது என்பதற்காக மத்திய அரசு இதில் எந்த முடிவும் எடுக்காமல் காலம் தாழ்த்தி வந்தது.

உண்மையில் 2006 முதல் 2008 வரையிலான கால கட்டத்தில் அப்போதைய உள்துறை அமைச்சர் வேண்டுமென்றே அப்சல் குருவின் கருணை மனு மீது உடனே பதில் அளிக்க வேண்டாம் என்று கட்டளையிட்டிருந்தார்.

இந்தக் கால தாமதத்தைத் தாங்க முடியாமல் மன உளைச்சலுக்கும் வேதனைக்கும் உள்ளான அப்சல் குரு, "உண்மையில் நான் பாரதீய ஜனதா தலைவர் எல். கே. அத்வானி நாட்டின் அடுத்த பிரதம அமைச்சராக வர விரும்புகின்றேன். காரணம். அவர் ஒருவர் தான் என் விவகாரமாக ஒரு நல்ல முடிவு எடுத்து எனக்கு தூக்குத் தண்டனையை நிறைவேற்றுவதற்கு மிகப் பொருத்தமானவர்'' என்று குறிப்பிட்டிருந்தார். "அப்போதாவது நான் படுகின்ற அவஸ்தையும், வேதனையும் ஒரு முடிவுக்கு வந்து விடுமல்லவா?'' என்றும் அவர் குறிப்பிட்டிருந்தார்.

உச்ச நீதிமன்றத்தின் தீர்ப்பை அடுத்து நவம்பர் 21, 2012 அன்று அஜ்மல் கசாபின் தூக்கு தண்டனையை நிறைவேற்றிய மாத்திரத்தில் எதிர்க்கட்சிகள் புது வேகத்துடன், புத்துணர்ச்சியுடன் அப்சல் குருவின் மரண தண்டனையை நிறைவேற்றும்படி கூக்குரலிட்டனர்.

எதிர்க்கட்சிகள் இந்தச் சூழலை தங்களுக்கு சாதகமாக ஆக்கி விடக்கூடாது என்பதற்காக அனைத்து முயற்சிகள் மற்றும் நடவடிக்கைகளும் கவனமாக மேற்கொள்ளப்பட்டன.

கஸாபின் தூக்கு தண்டனையை மிக இரகசியமாகவும், மறைமுகமாகவும் நிறைவேற்றியது அப்சல் குரு மரணத்திற்கு ஒரு முன்னுதாரணமாக ஆனது.

நவம்பர் 15ம் தேதி அன்று குடியரசு தலைவர் அப்சல் குருவின் கருணை மனுவை மீண்டும் புதிதாக மறு பரிசீலனை செய்யும்படி கேட்டு உள்துறை அமைச்சகத்திற்கே திரும்ப அனுப்புகின்றார்.

ஜனவரி 23, 2013 அன்று உள்துறை அமைச்சகம் கருணை மனுவை நிராகரிக்கும்படி பரிந்துரை செய்கிறது. குடியரசுத் தலைவரின் கருணை மனு நிராகரிக்கப்பு உடனே பிப்ரவரி 4, 2013 அன்று செயல்பாட்டுக்கு வருகின்றது. ஐந்து நாட்கள் கழித்து அதாவது பிப்ரவரி 9ம் தேதியன்று அதிகாலை அப்சல் குரு தூக்கிலிடப்படுகிறார்.

அரசாங்கம் இழுத்தடித்த இந்த நீண்ட காலகட்டத்தில் அப்சல் குருவும், அவரது குடும்பமும் மிகக் கடுமையான மன உளைச்சலுக்கும், மன சங்கடத்திற்கும் ஆளாயினர்.

இப்படி ஓர் அநியாயமான இழுத்தடிப்பிற்குப் பிறகு அப்சல் குருவுக்குத் தூக்கு தண்டனையை நிறைவேற்றியதன் மூலம் பல்வேறு வழக்குகளில் உச்ச நீதிமன்றம் வகுத்த சட்ட நெறிகளை மத்திய அரசாங்கம் காற்றில் பறக்க விட்டிருக்கின்றது.

1974ம் ஆண்டு ஆந்திர பிரதேச அரசுக்கு எதிரான எடிக்மா அநாமா வழக்கில் நீதிபதி கிருஷ்ணய்யர், "பல ஆண்டுகளாகப் பழிக்கப்பட்ட சிறை அறையில் அலைக்கழிக்கின்ற, அச்சத்திற்கு ஆட்பட்டு வெந்து நீறுகின்ற அப்பாவி கைதி தான் தூக்குத் தண்டனை கைதி'' என்று வர்ணிக்கின்றார்.

1983ம் ஆண்டுகளில் தமிழக அரசுக்கு எதிரான டி.வி. வத்தீஸ்வரன் வழக்கில் நீதிபதி சின்னப்பா ரெட்டி, "மரண தண்டனை நிறைவேற்றுவதில் எடுக்கும் கால தாமதம் மனிதத் தன்மையை இழக்க வைக்கும் அக்கிரமும் அநியாயமுமாகும். ஒரு மனிதனுக்கு அரசியல் சட்டம் 21ஆம் பிரிவு அளித்திருக்கின்ற அடிப்படை வாழ்வுரிமையைப் பாதிக்கின்ற வகையில் அநியாயமான, அக்கிரமமான அநீதியான வழியில் தட்டிப் பறிக்கும் செயல் ஆகும்'' என்று தெரிவித்தார்.

சிறையில் அடைக்கப்பட்ட ஒரு தூக்குத் தண்டனை கைதி, மாற்றுத் தீர்வுக்காகக் காத்திருக்கும் மனநோவு, ஏக்கம், ஏமாற்றம் மற்றும் நிச்சயமற்ற தன்மையில் உருவாகும் கொடூரமான மன வேதனை. அது அவரது உடலின் மீதும், உள்ளத்தின் மீதும் தொடுக்கின்ற கோரத் தாக்குதல்கள், கொடுமையான விளைவுகள், ஒட்டுமொத்தமாக ஏற்படும் உடல் நலக் கோளாறுகள் என அவர் அன்றாடம் அனுபவிக்கின்ற அவதிகள், அல்லல்களின் பட்டியல் நீண்டு கொண்டே போகின்றது.

அடுக்கடுக்கான இந்த வேதனைகள் அனைத்தையும் அரசாங்கம் கவனத்தில் கொள்ள வேண்டும் என்று பிரைவி கவுன்சில் (பிரிட்டனின் ஆராய்வாளர்களின் ஆலோசனைக் குழு) குறிப்பிட்டதை அந்த நீதிபதி அவர்கள் மேற்கோள் காட்டினார்.

குடும்பத்தார் படும் அல்லல்கள்

1983ம் ஆண்டு பஞ்சாப் அரசுக்கு எதிரான ஹேர் சிங் வழக்கில் நீதிமன்றம் அதே கருத்தைத் தெரிவித்திருந்தது.

1989ம் ஆண்டு குஜராத் அரசுக்கு எதிரான திரிவேனி பெண் வழக்கில், "காலங்கடந்து நிறைவேற்றப்படுகின்ற தூக்குத் தண்டனை அநீதி, அநியாயம், ஏற்க முடியாத காரியம்' என்று உச்ச நீதி மன்றம் தெளிவாகக் குறிப்பிட்டது.

கருணை மனுவைத் தாமதமாக முடிவு செய்யும் போது தண்டனைக்குள்ளானவர் உடல் ரீதியான சித்ரவதைக்கு உள்ளாகாவிட்டாலும் ஒரு குறிப்பிட்ட அளவுக்கு மன வேதனைக்கும், உளைச்சலுக்கும் உள்ளாகின்றார். என்பதைக் கவனத்தில் கொள்ள வேண்டும். இது உலகம் முழுவதும் ஒத்துக் கொள்ளப்பட்ட - மறுக்க முடியாத உண்மையாகும்.

தூக்குத் தண்டனையை நிறைவேற்றுவதில் அர்த்தமற்ற தாமதம் ஏற்படுமானால் தண்டனைக்குரியவர், "இந்தக் கால தாமதம் நியாயம் தானா? தனக்கு தூக்குத் தண்டனை நிறைவேற்றப்பட வேண்டுமா?' என்று கேட்டு நீதிமன்றத்தை அணுகுவதற்கு முழு உரிமை உண்டு என்றும் உச்ச நீதிமன்றம் தனது தீர்ப்பில் தெரிவித்தது.

கருணை மனு நிராகரிக்கப்பட்டுவிட்டால் இவ்வாறு நிராகரிக்கப்பட்ட விபரத்தை குடும்பத்தார்களுக்குத் தெரிவிப்பது சட்டப்பூர்வமான கடமையாகும் என்றும் அது தெரிவித்தது.

தூக்கு தண்டனை கைதி மட்டுமல்ல; அவருடைய குடும்பமும் சேர்ந்து அநாவசியமான தாமதத்தால் நெருங்கிய உறவினர்களும் மன உளைச்சல் வேதனைக்கு ஆளாகின்றனர் என்று உச்ச நீதிமன்றம் 2012ல் மத்திய பிரதேசத்திற்கு எதிரான ஜகதீஷ் வழக்கில் தீர்ப்பளித்தது.

தீர்ப்பு வழங்கப்பட்ட பின்னரும் ஒரு தூக்குத் தண்டனை கைதி நீண்ட நாட்கள் சிறையில் வாடி வதங்கிய பிறகும் நொந்து நூலான பிறகு இவருக்கு இப்படி ஒரு தூக்குத் தண்டனை நிறைவேற்றப்பட வேண்டுமா என்ற ஓர் உறுத்தலும், மனக் கலக்கமும் ஏற்படுகின்றது.

இந்த மன உளைச்சல். மனக்கலக்கம் ஏன் ஏற்படுகின்றது? நம்மிடம் உள்ள மனிதம் என்பது தான் அதற்குரிய பதில்.

மரண தண்டனை விதிக்கப்பட்ட ஒருவரை நீண்ட காலம் தண்டனை நிறைவேற்றாமல் காக்க வைப்பது மனிதாபிமானம் அற்ற செயல் என்று அதைக் கருதுகின்றோம். இவ்வளவு காலம் நீண்ட சிறை வாசத்தை அனுபவிக்கச் செய்துவிட்டு அவரை தூக்கில் போடுவது என்பது ஈவு இரக்கமற்ற மிருகத் தனமான தண்டனை என்றும் நாம் கருதுகின்றோம் என்று இந்திய உச்ச நீதிமன்றம் கூறிய கண்ணோட்டத்தை 1994ல் பிரைவி கவுன்சில் அப்படியே தன்னுடைய கருத்தாக ஏற்றுக் கொண்டது.

1989ல் மனித உரிமைகளுக்கான ஐரோப்பிய கோர்ட்டும், கனடா நாட்டு உச்ச நீதிமன்றமும் ஒரே விதமான கருத்தை ஏற்றுக் கொண்டன. அப்சல் குரு தூக்குத் தண்டனை விவகாரத்தில் நம்முடைய நாட்டின் உச்ச நீதிமன்றம், இன்ன பிற நீதிமன்றங்களின் கருத்தை உதறித் தள்ளிவிட்டது.

தூக்குத் தண்டனை நிறைவேற்றுவதில் ஏற்படும் காலதாமதம் காரணமாக மரண தண்டனை கைதிகள் மன வேதனைக்கும், அதிர்ச்சிக்கும் உள்ளாவது மட்டுமல்லாமல் அவரது குடும்பத்தார்கள், அவரது சொந்த பந்தங்களும் அதே மனவேதனைக்கும் அதிர்ச்சிக்கும் உள்ளாகின்றார்கள் என்பது உலகம் ஒருமித்து ஏற்றுக் கொள்கின்ற உண்மையாகும்.

தூக்கு தண்டனை நிறைவேற்றுகின்ற நாள், நேரம் நெருங்கும் போது குடும்பத்தார்கள் மனநிலை மிகப் பெரிய அளவில் பாதிக்கப்படுகின்றது. இதற்கு ஒரு மரியாதை கொடுக்கும் விதத்தில் மரண தண்டனை நிறுத்தி வைக்கப்பட வேண்டும் என்று சொல்கின்ற நாடுகளில், தண்டனையை நிறைவேற்றுவதற்கு முன்னால் அந்தக் கைதி, தனது சொந்த பந்தங்களைச் சந்திக்குமாறு ஏற்பாடு செய்கின்றனர்.

அவர்களிடம் தண்டனை நிறைவேற்றப்படுகின்ற நாள் நேரத்தைத் தெரிவிக்கின்றனர். தண்டனை நிறைவேற்றிய பின் அடக்குவதற்காக உடலையும் அவர்களிடம் கொடுத்து விடுகின்றனர். ஆனால் அப்சல் குரு விஷயத்தில் அது போன்று தகவல் தெரிவிக்கவில்லை. தண்டனை நிறைவேற்றுவதற்கு முன் அவரது குடும்பத்தார்கள் அவரை இறுதியில் சந்திக்க முடியாமல் ஆயினர்.

பிப்ரவரி 8ம் தேதி துரித தபாலில் தகவலை அனுப்பி விட்டோம் என்று மத்திய அரசு சொல்வது அர்த்தமற்றது; பொறுப்பற்றது.

இந்தக் கடிதம் தூக்குத் தண்டனை நிறைவேற்றிய இரண்டு நாட்களுக்குப் பிறகு காஷ்மீரில் இவருடைய வீட்டில் கொடுக்கப்பட்டது.

2012 மார்ச் - ஏப்ரல் மாதங்களில் உச்ச நீதிமன்றம் இரண்டு தூக்குத் தண்டனை கைதிகளின் மனுவை விசாரணைக்கு எடுத்துக் கொண்டது. தேவேந்திர பால், நரேந்திர நாத் தாஸ் ஆகியோர் தான் அவ்விருவரும்.

அவ்விருவரும் கருணை மனு அளித்த பின்பு 8லிருந்து 11 மாதங்கள் தண்டனை நிறைவேற்றாமல் கால தாமதம் செய்யப்பட்டனர். தண்டனை நிறைவேற்றப்படாமல் இது போல் கால தாமதம் செய்யப்பட்டு, காத்துக் கிடக்கின்ற கைதிகளின் ஆவணங்களையும் அனைத்து விபரங்களையும் நீதிமன்றத்தில் தாக்கல் செய்ய வேண்டும் என்று மத்திய அரசுக்கு உத்தரவு பிறப்பித்தது உச்சநீதி மன்றம்.

நீண்ட நாள் தாமதமாகும் வழக்குகளின் நிலை

கருணை மனு நிலுவையில் வைக்கப்பட்டவர்களின் விவரங்களை உச்ச நீதிமன்றத்தில் மத்திய அரசு தாக்கல் செய்தது.

அவ்வாறு நிலுவையில் உள்ள வழக்குகளில் உள்ள ஒன்று தான் அப்சல் குரு வழக்கு!

அர்த்தமற்ற, அநியாயமான, கால தாமதத்திற்குப் பிறகு சிறையில் வாடுகின்ற தண்டனை கைதிகளின் மிகப் பெரிய கேள்விக்கு விடை காணவும் இந்தப் பிரச்சினைக்கு நிரந்தரத் தீர்வு காணவும் என்னை (அந்தியார்ஜுனா அவர்களை) பொறுப்பாளராக உச்ச நீதிமன்றம் நியமித்தது. இது தொடர்பாக நான் உச்ச நீதிமன்றத்தில் வழக்கு விஷயத்தைக் குறிப்புப் படுத்தி தகவல் தெரிவித்தேன்.

இவ்வழக்கு மீதான விசாரனை ஏப்ரல் 19, 2012 அன்று முடிந்தது. தீர்ப்பு ஒத்தி வைக்கப்பட்டது. கருணை மனுவுக்குப் பிறகு கால தாமதமாகும் தூக்குத் தண்டனை கைதிகள் தொடர்பான வழக்குகளின் சட்ட நிலை குறித்த விவகாரம் உச்ச நீதிமன்றத்தில் நிலுவையில் இருக்கின்றது என்பது மத்திய அரசுக்கு நன்கு தெரியும்.

நிலுவையில் இருக்கின்ற இந்த மனுக்கள் மீதான உச்ச நீதிமன்றத்தின் அதிகாரப்பூர்வமான தீர்ப்புக்காகக் கண்டிப்பாகக் காத்திருக்க வேண்டிய மத்திய அரசு, அவசர கதியில் அப்சல் குருவின் தண்டணையை பிப்ரவரி 9, 2013ல் நிறைவேற்றி முடித்தது.

மத்திய அரசு நிறைவேற்றிய அப்சல் குருவின் இந்த மரண தண்டனை வரலாற்றில் மட்ட ரகமாகவும் கேவலமாகவும் நிறைவேற்றப்பட்ட தூக்குத் தண்டனையாக வரலாற்றில் பதிவாகி விட்டது.

இணை கற்பித்தல்                     தொடர்: 10

அடி வாங்கிய அவ்லியாக்கள்

நபி (ஸல்) அவர்கள், ஸஹாபாக்கள் அல்லாமல் வேறு யாரையாவது சொர்க்கத்திற்குரியவர் என்று நற்சான்று அளித்திருக்கிறார்களா? என்று பார்த்தால் இருவரைப் பற்றி நபிகள் நாயகம் (ஸல்) அவர்கள் சொர்க்கவாசிகள் என்று நற்சான்று அளித்திருக்கிறார்கள். அதில் ஒருவர் உவைஸ் அல்கர்னி என்பவர். இவர் தாபியீன்களில் ஒருவராவார்.

அவரைப் பற்றி நபி (ஸல்) அவர்கள், "எனக்குப் பின்னால் தாபியீன்களில் ஒருவர் வருவார். அவருடைய பெயர் உவைஸ் அல்கர்னி. அவரை நீங்கள் பார்த்தீர்களேயானால் உங்களுக்காக வேண்டி அவரை அல்லாஹ்விடம் பாவமன்னிப்பு தேடச் சொல்லுங்கள்'' என்று கூறினார்கள்.

ஆக தன்னுடைய உற்ற தோழர்களையே உவைஸ் அல்கர்னியிடம் பாவமன்னிப்பு தேடச் சொல்கிறார்கள் என்றால் இவரை நாம் நல்லடியார் என்று சந்தேகமே இல்லாமல் உறுதியாக இவர் சொர்க்கவாசி, நல்லடியார், மகான் என்று சொல்லலாம்.

அதேபோல மஹ்தீ என்பரைப் பற்றியும் நபிகளார் சொர்க்கவாசி என்று நற்சான்று அளித்திருக்கிறார்கள். இவ்வுலகில் அவர் நல்லடியாராக இருப்பார் என்று சொல்லியிருக்கிறார்கள். எனவே இதை வைத்து இவர் நல்லவர் என்று நாம் சொல்லிக் கொள்ளலாம்.

அல்லாஹ் இவர்களைப் பற்றி நல்லடியார் என்று அறிவித்துக் கொடுத்ததனால் தான் இவர் நல்லடியார் என்பது நபிகளாருக்கு தெரியும். எனவே இதை ஆதாரமாகக் கொண்டு நபிகளாருக்கு மறைவான ஞானம் இருக்கிறது என்று தவறாக விளங்கி விடக்கூடாது.

ஆக, இதுவரை நாம் பார்த்தவர்களைத் தவிர வேறு யாரையும், (நாம் தேடிப்பார்த்த வரை) நபிகள் நாயகம் (ஸல்) அவர்கள் நல்லடியார் என்றோ மகான்கள் என்றோ சொர்க்கவாசி என்றோ நற்சான்று அளித்ததே இல்லை.

அபூஹனிபா, ஷாஃபி, அல்லது அப்துல் காதிர் ஜீலானி இவர்களைக் கூட நபிகளார் நல்லவர்கள் என்றோ மகான்கள் என்றோ சொன்னதே இல்லை. அவ்வாறு இருக்கும் போது இவர்களையெல்லாம் நல்லவர் மகான் என்று நாம் எப்படி சொல்ல முடியும்? இவர்கள் நல்லடியார்கள் என்பதற்கு எந்தவித ஆதாரத்தையும் உலகம் அழியும் வரைக்கும் இவர்களால் காட்டவே முடியாது என்பதை நாம் விளங்கிக் கொள்ள வேண்டும்.

நாம் இதுவரை பார்த்த அத்தனை செய்திகளும், எந்த ஒருவரையும் நாமாக  நல்லடியார் என்றோ மகான்கள் என்றோ சொல்லக்கூடாது. நல்லடியார்கள் யார் என்பதை நம்மால் கண்டுபிடிக்க முடியாது என்பதையும் தெளிவுபடுத்துகின்றன. அல்லாஹ்வும் அவனது தூதரும் யாரை நல்லடியார்கள் என்று கூறினார்களோ அவர்களை மாத்திரமே நாம் நல்லடியார்கள் என்று சொல்ல வேண்டுமே தவிர, வேறு யாரையாவது நல்லடியார்கள், மகான்கள் எனக் கூறிக்கொண்டு அவர்களுக்காக விழா எடுப்பதும் அவர்களிடம் உதவி தேடுவதும், அவர்களின் காலில் விழுவதும் பெரும் பாவங்களில் ஒன்றாகும். அது நம்மை நிரந்தர நரகத்திற்குக் கொண்டு சேர்க்கும் என்பதையும் விளங்கி இந்தப் பாவத்திலிருந்தும் விலகிக்கொள்ள வேண்டும்.

நல்லடியார்களுக்கு மறுமையில் கிடைக்கக்கூடிய பரிசுகளை, அந்தஸ்துகளை, கூலியைப் பற்றி இஸ்லாம் சொல்கிறது. ஆனால் அவர்களைக் கொண்டாடுவதற்குச் சொல்லவில்லை. நல்லடியார்களைக் கண்டுபிடிக்க முடியும் என்றால் தான் அவர்களுக்குப் பாராட்டு விழா நடத்தலாமா என்ற கேள்வியே வரும். அவர்களைக் கண்டுபிடிக்க முடிந்தாலும் அந்த நல்லடியார்களுக்கு உருஸ் எடுக்கவோ, சந்தனக்கூடு எடுக்கவோ, பாராட்டு விழா நடத்தவோ அல்லாஹ் சொல்லவில்லை. அவர்களைப் போன்று நீயும் நல்லடியானாக ஆக வேண்டும் என்பதற்குத் தான் சொல்கிறான். அவர்களுக்கு உரூஸ் எடுக்க வேண்டும், பாராட்டு விழா நடத்த வேண்டும் என்று சொல்லியிருந்தால் அவர்களைக் கண்டுபிடிக்கக்கூடிய வழிமுறையையும் சேர்த்தே சொல்லியிருப்பான்.

ஆனால் அவர்களைப் பற்றி எந்த அடையாளத்தையும் அவன் சொல்லவில்லை. நீங்கள் நல்லடியார்களாக இருந்தால் இந்த அந்தஸ்தை அடைந்து கொள்வீர்கள். நீங்கள் இறைநேசர்களாக இருந்தீர்களென்றால் இந்த பரிசுகளைப் பெற்றுக் கொள்வீர்கள் என்று நம்மையும் இறைநேசர்களாக ஆக்குவதற்காக சொன்ன வாக்குறுதியே தவிர யாரையும் இறைநேசர் என்று முடிவு செய்து கொண்டாடுவதற்காக அல்ல என்பதைப் புரிந்து கொள்ள வேண்டும்.

இதிலிருந்து அல்லாஹ்வின் அறிவிப்பின் படியும், நபிகள் நாயகம் (ஸல்) அவர்களின் அறிவிப்பின் படியும் நல்லடியார்கள் யார் என்பதை நாம் அறிந்து கொண்டோம். ஆனால் அவர்களுக்குரிய எல்லை என்ன? நல்லடியாராக, அவ்லியாவாக ஆனவுடன் எல்லாவிதமான ஆற்றல்களும், சக்தியும் அவர்களுக்கு வந்துவிடுமா? அல்லது அல்லாஹ்விடம் நாம் கேட்பதை அவர்களிடமும் கேட்கலாமா? அல்லாஹ் செய்வதையெல்லாம் அவர் வந்து செய்து முடித்திடுவாரா? அல்லது அவர் மனிதத் தன்மையிலிருந்து அப்பாற்பட்டவராக ஆகிவிடுவாரா? என்பதை நாம் சற்று ஆராய்ந்து பார்க்கக் கடமைப்பட்டுள்ளோம்.

எந்த நல்லடியாராக இருந்தாலும் அவருக்கு மறுமையில் நல்ல அந்தஸ்து கிடைக்குமே தவிர இந்த உலகத்தில் அவர் மனிதத்தன்மைக்கு அப்பாற்பட்டவராக ஆகமாட்டார். மனிதனுக்கு முடியாத விஷயங்களைச் செய்பவராக ஆகமாட்டார். எல்லா நிலையிலும் அவர் மனிதராகத் தான் இருந்திருப்பார். இருந்திருக்க முடியும்.

முதலில் அவ்லியாக்கள் யார் என்பதைக் கண்டுபிடிக்க முடியாது என்பதைப் புரிந்துகொள்ள வேண்டும். அவ்லியாக்கள் என்று கண்டுபிடித்தால் கூட அவ்லியாக்கள் அதைச் செய்திருக்கிறார்கள், இதைச் செய்திருக்கிறார்கள் என்று அவிழ்த்து விட்டிருக்கிறார்களே அந்தக் கதைகள் பொய் என்பதற்கு நிறைய சான்றுகள் நபிகள் நாயகத்தின் வாழ்க்கை வரலாறுகளிலிருந்தும் குர்ஆனுடைய போதனைகளிலிருந்தும் நமக்குத் தெரிய வருகின்றது.

அல்லாஹ்வுடைய நேசர்களில் நபிமார்கள் சிறந்தவர்கள். அதில் நம்மில் யாருக்கும் கருத்து வேறுபாடு கிடையாது. அவ்லியாக்களெல்லாம் நபிமார்களுடைய அந்தஸ்துக்குக் கீழ் தான் வருவார்கள். நபிமார்கள் ஒவ்வொரு காலத்திலேயும் அந்தந்த மக்களிடம் பிரச்சாரம் செய்தார்கள். அவ்வாறு பிரச்சாரம் மேற்கொள்ளும் போது, இன்றைக்கு நாம் ஒருவரை அவ்லியா என்று நினைத்து வைத்துள்ள மாதிரி அன்றைக்கு நபிகளாரை அம்மக்கள் நினைத்திருந்தால், அந்த நபிமார்கள் அடி வாங்கியிருப்பார்களா? கேலி, கிண்டல் செய்யயப்பட்டிருப்பார்களா? நாட்டை விட்டு துரத்தப்பட்டிருப்பார்களா? என்பதை சற்று சிந்திக்கக் கடமைப்பட்டுள்ளோம்.

ஆனால் நாம் இன்றைக்கு அவ்லியாக்கள் என்றால், அவர் கடவுள் மாதிரியும் நாம் அவர் முன்னால் பணிந்து நிற்க வேண்டும் எனவும், அவர் நடந்து வந்தால் எல்லோரும் அவருக்கு எழுந்து மரியாதை செலுத்த வேண்டும் எனவும் எண்ணி வைத்திருக்கிறார்கள்.

எந்த மனிதனும் மனிதத் தன்மைக்கு அப்பாற்பட்டவனாக ஆக முடியாது. உதாரணத்திற்கு, எனக்குக் கடவுள் தன்மை இருக்கிறது, மனிதத் தன்மைக்கு அப்பாற்பட்ட சக்தி இருக்கிறது என்று ஒருவன்  சொல்லி, வாயில் இருந்து லிங்கத்தை எடுக்கிறேன், இரும்பைத் தங்கமாக மாற்றுகிறேன் என்றால் யாராவது அவன் மேல் கை வைப்பார்களா? அவனை அடிப்பார்களா? அவனைத் திட்டுவார்களா? எதுவும் செய்யமாட்டார்கள்.

இந்த மாதிரி நபிமார்களைப் பற்றிய பயம் அந்த மக்களுக்கு உண்டாகியிருக்குமானால் யாராவது அவர்களை விரட்டியிருப்பார்களா? கொலை செய்திருப்பார்களா?

ஆக நபிமார்கள் என்ற மிகச் சிறந்த நல்லடியார்கள் வாழ்ந்த போது அச்சமுதாய மக்களால் கிள்ளுக் கீரையாகக் கருதப்பட்டார்கள்; எள்ளி நகையாடப்பட்டார்கள்; கேலி கிண்டல் செய்யப்பட்டார்கள். பைத்தியக்காரன் என்று சொன்னார்கள். கிறுக்கன் என்று சொன்னார்கள். பலவிதமான துன்பங்களுக்கும் தொல்லைகளுக்கும் உள்ளாக்கினார்கள். இந்தச் சோதனைகளின் போது அவர்கள் எப்படி இருந்தார்கள்? நம்மைப் போல சாதாரண மனிதராகத் தான் இருந்தார்கள். மந்திரவாதியாக இருக்கவில்லை. ஜோசியக்காரனாகவும் இருக்கவில்லை.

ஆனால் அவர்கள் மந்திரம் தந்திரம் தெரிந்தவராக இருந்திருந்தால் யாரும் அவர்களை நெருங்கியிருக்க மாட்டார்கள். அதிலும் குறிப்பாக கல்லுக்குக் கூட சக்தி இருக்கின்றது என்று நினைக்கக்கூடியவர்கள், அந்தக் கல்லைத் திட்டினால் அது நம்மை குற்றம் பிடித்துவிடும் என்று நினைத்தவர்கள், நபிமார்களுக்கு சக்தி இருக்கிறது என்று நினைத்தால் அவர்களிடம் நெருங்கியிருப்பார்களா?

அல்லாஹ்வை ஏற்றுக் கொள்ளாத அனைத்து சமுதாய மக்களுமே கல்லுக்கு சக்தி இருக்கிறது என்று நினைத்துத் தான் அதனை வழிபட்டார்கள். ஆனால் அந்த சக்தி மூஸா நபிக்கு, ஈஸா நபிக்கு, இப்ராஹீம் நபிக்கு இருக்கிறது என்று நினைத்திருந்தால் அனைவரும் அந்தந்த நபிமார்களிடம் கையைக் கட்டிக் கொண்டு சரணடைந்திருப்பார்கள். அனைவரும் அவர்களை ஏற்றுக் கொள்ளக் கூடியவர்களாக மாறியிருப்பார்கள். ஆனால் அந்த மாதிரி யாரும் இருந்ததாக வரலாறு இல்லை. நபிமார்கள் வாழ்ந்த ஒவ்வொரு சமுதாயத்திலும் எந்த மாதிரி மாற்றங்கள் நிகழ்ந்தன என்பதைப் பற்றி இறைவன் கூறுகிறான்.

அதாவது மூஸா, மற்றும் ஹாரூண் நபி இருவரும் ஏகத்துவப் பிரச்சாரம் செய்கிறார்கள். அவ்வாறு செய்யும் போது பத்து அற்புதங்களை அல்லாஹ் கொடுத்து அனுப்புகிறான். மற்ற நேரத்தில் சாதாரண மனிதராகத் தான் இருப்பார்கள். கைத்தடியை போட்டால் பாம்பாக மாறுவது, சட்டைப்பைக்குள் கையை நுழைத்து வெளியே எடுத்தால் வெண்மையாக, பிரகாசமாக இருப்பது உட்பட 10 அத்தாட்சிகளை அவர்களுக்கு வழங்கியதாக அல்லாஹ் கூறுகிறான். அந்த 10 அற்புதங்களையும் ஃபிர்அவ்னிடமும் அந்த சமுதாய மக்களிடமும் காட்டியபோது, அதைக் கண்ணால் பார்த்துக் கொண்டே...

"இவ்விருவரின் சமுதாயத்தினர் நமக்கு அடிமைகளாக இருக்கும் நிலையில் நம்மைப் போன்ற இரு மனிதர்களை நாம் நம்புவோமா?'' என்றனர்.

அல்குர்ஆன். 23:47

மேலும் அவ்விருவரைப் பற்றியும் அந்த மக்கள், "நீங்கள் எங்களைப் போன்ற மனிதர்களே. எங்கள் முன்னோர் வணங்கிக் கொண்டிருந்தவைகளை விட்டும் எங்களைத் தடுக்க விரும்புகிறீர்கள். எனவே எங்களிடம் தெளிவான அற்புதத்தைக் கொண்டு வாருங்கள்!'' என்று அவர்கள் கேட்டனர்.

அல்குர்ஆன். 14:10

அதேபோன்று நூஹ் நபியைப் பார்த்து,

"எங்களைப் போன்ற ஒரு மனிதராகவே உம்மைக் காண்கிறோம். எங்களில் சிந்தனைக் குறைவுடைய தாழ்ந்தவர்களே உம்மைப் பின்பற்றுவதைக் காண்கிறோம். உங்களுக்கு எங்களை விட எந்தச் சிறப்பும் இருப்பதாக நாங்கள் கருதவில்லை. மாறாக உங்களைப் பொய்யர்களாகவே கருதுகிறோம்'' என்று அவரது சமுதாயத்தில் (ஏக இறைவனை) மறுத்த பிரமுகர்கள் கூறினர்.

அல்குர்ஆன் 11:27

மேலும், 23:24-33, 7:131 ஆகிய வசனங்களிலும் இந்தச் சம்பவம் இடம் பெற்றுள்ளது.

ஆக அத்தனை நபிமார்களும் அம்மக்களிடத்தில் பிரச்சாரம் செய்யும் போது அவர்கள் சொல்லக்கூடிய செய்தி சரியா? தவறா? என்பதை பார்க்காமால், இவர் யார்? இவருக்கும் நமக்கும் என்ன வித்தியாசம் என்பதைத் தான் பார்த்தார்கள். நாம் அடித்தால் அவர் கீழே விழுந்து விடுகிறார். நாம் கவலைப்படுவதைப் போன்று அவரும் கவலைப்படுகிறார். நம்மைப் போன்று அவரும் முதுமையை அடைகின்றார். இவரை நாம் எவ்வாறு தூதராக ஏற்றுக் கொள்வது என்று எண்ணினார்கள். அதனால் அவர்கள் தூதர்களை ஏற்றுக் கொள்ளவில்லை.

இந்த இருவரும் 10 அற்புதங்களைக் காட்டியும் கூட அவர்களுடைய கண்களுக்கு சாதாரண மனிதர்களாகத் தான் தென்பட்டுள்ளார்கள். ஆனால் அவர்கள் இருவரும் மந்திரவாதியாகத் தென்பட்டு இருப்பார்களேயானால் அந்த மக்கள் அனைவரும் அவ்விருவரிடம் சரணாகதி அடைந்திருப்பார்கள்.

அதேபோன்று நபிகள் நாயகம் (ஸல்) அவர்கள் அழைப்புப் பணி செய்யும் போது அவர்களுடைய ஒழுக்கம், பண்பாடு, நேர்மை, வாய்மை இதை வைத்து அவர்களை மறுக்கவில்லை. இதை அவர்கள் கண்கூடாக பார்த்தார்கள். மக்களிடத்தில் நபியவர்களுக்கு நல்ல மதிப்பும், மரியாதையும் இருந்தது. அதனால் தான் அவர்களை அம்மக்கள் சாதிக் (உண்மையாளர்), அமீன்  (நம்பிக்கைக்குரியவர்) என்றும் அழைத்து வந்தனர்.

இவ்வாறு இருக்க அந்த மக்கள் எதை வைத்து நபி (ஸல்) அவர்களை மறுத்தார்கள்? இவர் அல்லாஹ்வின் தூதர் என்று சொல்கிறார். ஆனால் நம்மைப் போலத்தானே இருக்கிறார். வேறு எந்த வித்தியாசமும் இல்லையே! என்று கூறியே மறுத்தார்கள். இதைப் பின்வரும் வசனத்தில் அல்லாஹ் தெரிவிக்கிறான்.

"இத்தூதருக்கு என்ன நேர்ந்தது? இவர் உணவு உண்கிறார்; கடை வீதிகளில் நடமாடுகிறார்; இவரோடு ஒரு வானவர் இறக்கப்பட்டு இவருடன் (சேர்ந்து) அவர் எச்சரிப்பவராக இருக்கக் கூடாதா?'' என்று கேட்கின்றனர்.

அல்குர்ஆன் 25:7

ஆக, நபிமார்களை அவர்கள் ஏற்றுக் கொள்ளாததற்குக் காரணம், நாம் யாரை அவ்லியாக்கள் என்று நினைத்து, அவர்களுக்கு ஏராளமான ஆற்றல்கள் இருக்கின்றன என்று நம்புகிறோமோ அவர்களைப் போன்று அந்த நபிமார்கள் இல்லை என்பது தான்.

அதேபோன்று ஸாலிஹ் நபியவர்களும் மக்களிடத்தில் பிரச்சாரம் செய்கிறார்கள். அவர்களைப் பற்றிய அம்மக்களின் எண்ணம் எவ்வாறு இருந்தது என்பதை இறைவன் சொல்கிறான்.

"நீர் எங்களைப் போன்ற மனிதர் தவிர வேறு இல்லை. நீர் உண்மையாளராக இருந்தால் சான்றைக் கொண்டு வருவீராக!'' (என்றும் கூறினர்)

அல்குர்ஆன் 26:154

இந்த வசனத்தில் அந்த மக்கள் சாலிஹ் நபியிடத்தில் நீயும் எங்களைப் போல் ஒரு மனிதர் தானே! எங்களைப் போன்று சாப்பிடுகிறாய்; தூங்குகிறாய்; மலம், ஜலம் கழிக்கின்றாய். இவ்வாறு இருக்கும்போது எதை வைத்துக் கொண்டு நீ நபியென வாதிடுகிறாய் என கேட்டார்கள்.

மேலும் அம்மக்கள் சாலிஹ் நபியைப் பார்த்து,

"நம்மைச் சேர்ந்த ஒரு மனிதரையா நாம் பின்பற்றுவோம்? அப்படிச் செய்தால் வழி கேட்டிலும் சிரமத்திலும் நாம் ஆகி விடுவோம்''

அல்குர்ஆன் 54:24

என்றும் கூறியதாக அல்லாஹ் சொல்லிக் காட்டுகிறான்.

அதே போன்று ஷூஐப் நபியிடத்தில் அந்தச் சமுதாய மக்கள் என்ன சொன்னார்கள் என்பதையும் இறைவன் கூறுகிறான்.

"நீர் எங்களைப் போன்ற ஒரு மனிதர் தவிர வேறில்லை. உம்மைப் பொய்யராகவே கருதுகிறோம்.

அல்குர்ஆன் 26:186

அதே போல யாசீன் என்கிற சூராவில், ஒரே சமுதாயத்திற்குப் பல தூதர்களை அல்லாஹ் அனுப்பியதாகச் சொல்கிறான். முதலில் ஒரு தூதரை அனுப்புகிறான். அவரை நம்ப மறுக்கிறார்கள். இரண்டாவதாக ஒரு தூதரை அனுப்புகிறான். அவரையும் நம்ப மறுக்கிறார்கள். அவ்விருவருடன் மூன்றாவது நபரைக் கொண்டு பலப்படுத்துகிறான். இவ்வாறு மூன்று தூதர்களும் சேர்ந்து வருகிறார்கள். அந்த மூவரையும் பார்த்து,

"நீங்கள் எங்களைப் போன்ற மனிதர் தவிர வேறில்லை. அளவற்ற அருளாளன் எதையும் அருளவில்லை. நீங்கள் பொய் சொல்வோராகவே இருக்கிறீர்கள்'' என்று கூறினர்.

அல்குர்ஆன் 36:15

நீங்கள் மூன்று பேர் வந்தாலும் சரி, முப்பது பேர் வந்தாலும் சரி நீங்கள் எங்களைப் போல மனிதர்கள் தான், உங்களிடம் மனிதர்களுக்கு அப்பாற்பட்ட சக்தி ஒன்றுமே இல்லையே! நாங்கள் செய்வதைத் தானே நீங்களும் செய்கிறீர்கள். பிறகு எப்படி நீங்கள் இறைத்தூதர்களாக ஆக முடியும். எங்களுடைய கண்களுக்கு நீங்கள் மந்திரவாதிகளாகவோ, தந்திரவாதிகளாகவோ தென்பட்டதே இல்லையே! பிறகு எப்படி நாங்கள் உங்களை இறைத்தூதர்கள் என நம்புவது? என்று கேட்டனர்.

அதேபோல பிரச்சாரம் செய்ய வந்த அத்தனை நபிமார்களையும் பைத்தியக்காரன், கிறுக்கன் என்றுறெல்லாம் அம்மக்கள் எள்ளி நகையாடினார்கள்.

நீயும் எங்களைப் போல ஒரு மனிதன் தான் என்பது கூட அந்த நபிமார்களுக்குக் கவலையை ஏற்படுத்தவில்லை. இது பரவாயில்லை. நாகரீகமான வார்த்தை என்று சொல்லலாம். ஆனால் அதையும் மீறி பைத்தியக்காரன், கிறுக்கன் போன்ற அநாகரீகமான வார்த்தைகளையும் பயன்படுத்தி இந்தப் பிரச்சாரத்திற்குப் பல்வேறு இடையூறுகளை ஏற்படுத்தினர். அல்லாஹ் ஒருவனையே வணங்குங்கள் என்று நபிமார்கள் சொல்லும்போது, அந்த நபிமார்களைப் பார்த்து, "இவருக்குப் பைத்தியம் பிடித்து விட்டது' என்று கூற ஆரம்பித்துவிட்டனர். இதை அல்லாஹ் பின்வரும் வசனத்தில் கூறுகிறான்.

"அறிவுரை அருளப்பட்டவரே! நீர் பைத்தியக்காரர் தான்'' என்று அவர்கள் கூறுகின்றனர்.

அல்குர்ஆன் 15:6

மேலும் 23:25, 26:27, 37:36, 44:14, 51:52, 54:9 ஆகிய வசனங்களில் நபிகளார் உட்பட எல்லா நபிமார்களையும் எவ்வாறு கேலி கிண்டலாகப் பேசினர் என்பதைத் தெளிவுபடுத்துகிறான்.

ஆக, அம்மக்கள் நபிமார்களைப் பைத்தியக்காரன் என்று சொல்லும் அளவுக்கு அவர்கள் தைரியமாக இருந்தார்களென்றால் அதற்குக் காரணம் அந்த அளவுக்கு நபிமார்கள் சாதாரண மனிதர்களாக அவர்களுக்குக் காட்சியளித்தனர்.

அவர்கள் தங்களுக்கு தெய்வீக சக்தி இருப்பதாகவோ, தங்களால் எல்லாவற்றையும் செய்து முடித்துவிட முடியும் என்றோ, எங்களைத் திட்டினால் அழிந்துவிடுவீர்கள் என்றோ, எங்களைத் தொட்டாலே நாசமாகி விடுவீர்கள் என்றோ அவர்கள் கூறவில்லை. எல்லோரையும் போல் சாதாரணமான மனிதராக இருந்ததால் தான் அவர்களை அம்மக்கள் திட்ட முடிந்தது; அடிக்க முடிந்தது; கேலி செய்ய முடிந்தது.

இன்று, இறந்து போன ஒரு மனிதரைக் கூட திட்டுவதற்கு மனிதன் பயப்படுவதைப் பார்க்கிறோம். 10 வருடமாக தர்காவிற்குச் சென்று நேர்ச்சை செய்தும் குழந்தை பிறக்கவில்லை. ஆனாலும் அந்த அவ்லியாவைத் திட்டுவதில்லை. திட்டினால் அவரால் நமக்கு ஏதேனும் பாதிப்பு ஏற்பட்டுவிடுமோ என்று பயப்படுகிறான். இப்படித் தான் மனிதனுடைய சுபாவம் இருக்கிறது.

இந்த மாதிரியான செயல்களை நபிமார்கள் தங்களுக்கு ஏற்படுத்தி வைத்திருந்தால் கிறுக்கன் என்று அவர்களைச் சொல்ல முடியுமா? பைத்தியக்காரன் என்று சொல்ல முடியுமா? நீயும் எங்களைப் போல மனிதர் தான் என்று சொல்ல முடியுமா? ஒருபோதும் சொல்ல முடியாது.

இதிலிருந்து என்ன விளங்குகிறது? இவர்கள் கற்பனை செய்து வைத்திருப்பது போல் எந்த நபியும் இருந்தது கிடையாது. நபிமார்களுக்கே கிடையாது என்றால் மற்ற மனிதர்களுக்கு எவ்வாறு அதுபோன்ற சக்திகள் இருக்கும் என்பதை நாம் புரிந்து கொள்ள வேண்டும்.

இன்னும் சொல்லப்போனால் நபிமார்களைப் பற்றி மேலும் சில  விஷயங்கள் இருக்கின்றன. அவர்கள் எப்படியெல்லாம் மனிதர்களாக இருந்தார்கள். அவர்களுடைய சக்தி (ஆற்றல்) எந்த அளவுக்கு இருந்தது? அவர்களால் நினைத்ததையெல்லாம் செய்து விட முடியுமா? இது போன்ற விஷயங்களையெல்லாம் நாம் அலசிப் பார்த்தோமென்றால் இறைநேசரை நாம் தீர்மானிக்க முடியும் என்ற கருத்து மொத்தமாக அடிபட்டுப் போய்விடும்.

இறைநேசரைக் கண்டுபிடிக்க முடியாது என்பதிலேயே எல்லாம் அடிபட்டுப் போய்விடுகின்றது. அப்படியே கண்டுபிடித்தாலும் அந்த இறைநேசருக்காவது நாம் நினைத்த மாதிரி சக்தி இருக்குமா? கிடையவே கிடையாது என்பதை அல்லாஹ் தெள்ளத் தெளிவாகச் சொல்லிக் காட்டுகிறான். நபிகள் நாயகம் (ஸல்) அவர்களும் சொல்லிக் காட்டுகிறார்கள்.

அந்தச் சான்றுகளை இன்ஷா அல்லாஹ் அடுத்த இதழில் காண்போம்.

கால் நூற்றாண்டு கடத்திய ஸைபுத்தீன்

களமும் காரணமும்

ஏகத்துவப் பிரச்சாரம் என்பது இறைத்தூதர்கள் செய்த பிரச்சாரம் ஆகும். இறைத்தூதர்கள் செய்த இந்தப் பிரச்சாரத்தை முறியடிக்கவும், முடக்கவும், தங்களது அசத்திய அணியிலிருந்து யாரும் சத்திய அணிக்குத் தாவி விடக்கூடாது என்ற நோக்கத்திலும் பல்வேறு எதிர்வாதங்களை அந்த மக்கள் முன்வைத்தார்கள். அந்த எதிர்வாதங்களுக்கெல்லாம் இறைத்தூதர்கள் இடைவிடாத, மறுக்க முடியாத பதில்களை அளித்தார்கள்.

தமிழகத்தில் ஏகத்துவப் பிரச்சாரம் முன்வைக்கப்பட்ட போது இதுபோன்ற எதிர்வாதங்கள் வைக்கப்பட்டன. அதற்கெல்லாம் அழகான, அறிவார்ந்த பதில்கள் அளிக்கப்பட்டன.

அந்தப் பதில்கள் எழுத்துக்களாக ஏடுகள், சுவரொட்டிகள், பிரசுரங்கள் வடிவிலும், உரைகளாக ஒலி, ஒளி நாடாக்கள் வடிவிலும் அமைந்தன. அதன் உச்சக்கட்டப் பரிமாணம், விவாதக் களமாக அமைந்தது. அவ்வகையில் கோட்டாறு விவாதம் முதல் களமாகவும் தவ்ஹீதின் தளமாகவும் அமைந்தது.

இந்த விவாதக் களம் அனைத்துமே நாம் அழைத்து உருவானவை. நாம் விடுத்த அழைப்பை ஏற்று வந்தவர்களும் உண்டு. நழுவி, தப்பி, தலைதெறிக்க ஓடியவர்களும் உண்டு.

இந்த வகையில் ஸைபுத்தீன் ரஷாதியின் விவாதக் களம் கடந்து வந்த பாதையை நாம் அறிந்து கொள்வது அவசியமாகும்.

கால் நூற்றாண்டுகளாக எந்த வலையிலும் சிக்காமல் நழுவிக் கொண்டிருந்த ஸைபுத்தீன் ரஷாதியை விவாதக் களத்திற்குக் கொண்டு வர நாம் செய்த முயற்சிகளைப் பற்றி விளக்குவதே இக்கட்டுரையின் நோக்கம்.

மத்ஹபுகள் மாநாடு

தவ்ஹீதுப் பிரச்சாரம் தலை தூக்க ஆரம்பித்தவுடன் அதை முடக்க வேண்டும் என்று ஆலிம்கள் மூர்க்கத்தனமாக முன்னணியில் நின்று எதிர்த்த ஊர்களில் ஒன்று மேலப்பாளையம்.

மத்ஹபுகளின் அடித்தளங்கள் ஆட்டம் காண ஆரம்பித்துவிட்டது என்று அரண்டு போன மேலப்பாளையம் மஜ்லிசுல் உலமா, அதைத் தடுக்கும் விதமாக புதுமனைப் பள்ளிவாசலில் 06.12.1988 அன்று மத்ஹபுகள் மாநாடு நடத்தியது. இதில் ஸைபுத்தீன் ரஷாதியின் பெயரும் இடம் பெற்றிருந்தது.

அப்போது நமது ஜமாஅத்தின் சார்பாக அசத்தியவாதிகளுக்கு எதிராக அழைப்பும் அறைகூவலும் விடப்பட்டு சுவரொட்டிகள் ஊர் முழுவதும் ஒட்டப்பட்டன.

இதற்குப் பதிலளிக்கும் விதமாக அந்த மத்ஹபு மாநாட்டில் ஸைபுத்தீன் ரஷாதி பேசிய சவடால் பேச்சுக்கள் இதோ:

யாராவது நேரடியாக விவாதிக்கத் தயாரான்னு சொல்லி இங்கே வால்போஸ்டரெல்லாம் ஒட்டியிருப்பதாகக் கேள்விப்பட்டேன். எனக்கும் கூட ரொம்ப சந்தோஷம். அந்த அழகிய அருமையான நண்பர்களுக்கு நான் சொல்கிறேன். அந்தப் புண்ணிய காரியத்தை நீங்கள் கட்டாயம் செய்யுங்கள். தேதி வாங்க வேண்டியது உங்களுடைய வேலை. வரவேண்டியது என்னுடைய கடமை. இடம் குறிப்பிட வேண்டியது உங்களுயை வேலை. அந்த இடத்திற்கு ஆஜராக வேண்டியது என்னுடைய கடமை.

உன் கிட்ட தகுதி இருக்கா? சொல். தகுதி இருந்தால் கொஞ்சம் முன்னால் வா! நான் உன்னைப் பார்க்கிறேன். எவ்வளவு தகுதியானவன் என்று.... நிறைய ஆட்களிடம் சொல்லவில்லை. சவாலுடைய விஷயங்களையெல்லாம் சொல்லவில்லை. எனக்கு என்ன ஆசை என்றால் இவன் எங்கேயாவது சிக்குவான்; நேரே கேட்க வேண்டும் என்று....

ஒரு நாளில் நான் சொன்ன தேதி கேட்டு எழுதி வாதிடத் தயார். ஆனால் மக்களுக்குப் பலன் தரும் அளவில் வாதிட வேண்டும். கோட்டாறு, கடையநல்லூர் மாதிரி சண்டை போடக்கூடாது.

என்னிடம் வாதிட வேண்டும் என்றால் உட்கார்ந்து சரியான முறையில் வாதிட வேண்டும். அதற்குக் கீழ்க்கண்ட ஏதாவது குறிப்பிடுங்கள். முதலில் விவாதத்திற்குரிய பொருளைக் குறிக்க வேண்டும். எதைப் பற்றி விவாதம்? நாம் சொன்னதைத் தான் சொல்லப் போகிறோம். புதிதாக எதுவும் சொல்லவில்லை. எங்கள் கிதாபுகளிலிருந்து இதைத் தவறு என்று நீங்கள் தான் குற்றம் சொல்கிறீர்கள். எனவே எதைப் பற்றி வாதிட வேண்டும் என்று நீ தான் சொல்ல வேண்டும்.

இரண்டாவதாக, தனிக்குத் தனியாக மோதலாமா? அணிக்கு அணியாக மோதலாமா? ஏனென்றால் நான் ஒருத்தனாக வந்து நீ 4 பேருடன் வந்து கூச்சல் போட்டால் என்ன செய்வது? அப்போதும் சமாளிக்க அல்லாஹ் திறமையைக் கொடுத்திருக்கிறான். இருந்தாலும் ஒருமையா? அணியா? என்பதை முடிவு செய்ய வேண்டும்.

விவாத மன்றத்துக்கு யாரைத் தலைவராகப் போட வேண்டும் என்று நீயே நிர்ணயம் செய். இந்த மூன்றையும் முடித்து விட்டு வா! தேதி நான் கொடுக்கிறேன்.

நடுவர் தீர்ப்பு கூற ஆள் வேண்டும். அவன் மதனியாக இருக்கக்கூடாது. நான் முதர்ரிஸ்ஸாக 17 வருடம் சர்வீஸ் உள்ளவன். எனவே 20 வருடம் முதர்ரிஸ் ஆக இருந்த ஆளை நீ தான் கூட்டி வரவேண்டும்...

இவ்வாறு ஸைபுத்தீன் ரஷாதி சவடால் விட்டுப் பேசியதைக் கேட்ட நமது சகோதரர்கள் புதுமனைப் பள்ளிவாசலுக்குச் சென்றனர். அங்கு இருந்த மஜ்லிஸ் உலமாவினர், இவர்களுடன் விவாதம் தேவையில்லை, வெளியே செல்லுங்கள் என்று கூறி விட்டனர். அப்போது ரஷாதியும் நமது சகோதரர்களுடன் வெளியே வந்து, "அவர்கள் (மஜ்லிஸ் உலமா) முனாழராவை விரும்பாவிட்டாலும் நான் தயார்; பி.ஜே.யை சந்திக்க ஏற்பாடு செய்யுங்கள்'' என்று கூறினார்.

விவாதத்திற்குத் தயார் - பி.ஜே. அறிவிப்பு

அப்போது நமது ஜமாஅத்தில் இருந்த நிஜாமுத்தீன் மஹ்ழரி, பி.ஜே. அவர்களுக்கு இது குறித்துக் கடிதம் எழுதுகின்றார். பி.ஜே. அவர்களிடமிருந்து, விவாதத்திற்குத் தயார் என்று குறிப்பிட்டுப் பதில் கடிதம் வந்தது. 08.12.1988 தேதியிட்ட அந்தக் கடிதத்தில் பி.ஜே. குறிப்பிட்டதாவது:

ஸைபுத்தீன் என்பவர் நேரடியாக விவாதத்திற்கு அறைகூவல் விடுவதும் நெருங்கிச் சென்றால் விலகி ஓடுவதும் வாடிக்கையாகக் கொண்டவர். விருதுநகர், முத்துப்பேட்டை போன்ற பகுதிகளிலும் இப்படி சவால் விட்டிருக்கின்றார். விருதுநகர் தவ்ஹீத் சகோதரர்கள் இவருடன் விவாதத்திற்கு ஏற்பாடு செய்யத் தொடர்பு கொண்ட போது, இவரிடமிருந்து மழுப்பல் நிறைந்த பதில்களைத் தவிர பயன் ஏதுமில்லை. விருதுநகர் கடிதங்கள் தேவையெனில் அனுப்பி வைக்கிறேன். அல்லது விருதுநகர் ஜமாஅத்தில் பெறலாம்.

உங்கள் ஊரிலும் அவர் சவால் விட்டிருக்கின்றார். மத்ஹபுகள் பற்றியும், தராவீஹ் பற்றியும் மட்டுமே பேச அவர் சம்மதம் தெரிவித்திருப்பதாகக் குறிப்பிட்டுள்ளீர்கள். அதை நான் ஏற்றுக் கொள்கிறேன். அந்த இரண்டு விஷயங்களைப் பற்றி மட்டும் முதலில் பேசுவோம்.

தனியாகவும், அணியாகவும் விவாதிக்க நான் தயார் தான். எதுவானாலும் எனக்குச் சம்மதமே! இருப்பினும் என்னிடமே முடிவு செய்யும் பொறுப்பை நீங்கள் சாட்டி விட்டதால் நானும் ஸைபுத்தீனும் மட்டுமே விவாதிக்க வேண்டும் என்பதே என் விருப்பம். இதில் அவருக்கு ஆட்சேபணை என்றால் மட்டும் அணியாக வைத்துக் கொள்ளலாம்.

குர்ஆன், ஆதாரப்பூர்வமான ஹதீஸ்கள் அடிப்படையில் மட்டுமே விவாதம் நடக்க வேண்டும். விவாதத்தில் ஆதாரங்களாக மார்க்க அறிஞர்களின் கருத்துக்கள் சமர்ப்பிக்கப்படலாகாது என்பது தான் எனது நிலை.

விவாதத்தில் முடிவு கூறுவதற்காக ஒரு நீதிபதியை ஏற்படுத்த வேண்டும் என்ற உங்களின் கோரிக்கை விசித்திரமாக உள்ளது. இரண்டு சாராரும் ஏற்றுக் கொள்ளக்கூடிய நீதிபதிகள் எவருமே இருக்க மாட்டார்கள். அப்படியே ஏற்றுக் கொண்டாலும் விவாதத்தின் முடிவில் தீர்ப்புக் கூறிய பின் அவரது தீர்ப்பை இரு சாராரில் எவராவது விமர்சனம் செய்து, தோல்வியை ஒப்புக் கொள்ள மறுக்கக் கூடும்.

எனவே மக்கள் மத்தியில் இரு சாராரும் தங்கள் வாதத்தை எடுத்து வைத்தால், மக்கள் யார் சொல்வது சரி என்று முடிவு செய்ய முடியும். இதுதான் முறையும் கூட. நீதிபதியை ஏற்படுத்துவது எனக்கு உடன்பாடில்லாத ஒன்று.

20 ஆண்டுகள் முதர்ரிஸாகப் பணியாற்றிய, எவரை வேண்டுமானாலும் நானே அழைத்து வரலாம் என்று அவர் கூறுவதாக எழுதியுள்ளீர்கள். யார் நியமித்தாலும் இதே பிரச்சனை ஏற்படத்தான் செய்யும். என்றாலும் இதைக் காரணம் காட்டி அவர் (ஸைபுத்தீன்) தட்டிக் கழிக்கக்கூடாது என்பதற்காக எனக்கு விருப்பமில்லாவிட்டாலும் அதையும் நான் ஏற்கிறேன். 20 ஆண்டுகள் முதர்ரிஸாகப் பணியாற்றிய ஒருவரை நானே அழைத்து வருகிறேன். அவர் நடுவராக இருக்கட்டும். அவருக்கு 20 ஆண்டுகள் தர்ஸ் நடத்திய அனுபவமும் அதற்கான சான்றுகளும் இருக்கின்றதா என்பதைச் சோதித்து உறுதி செய்து கொண்ட பின் அவரை நடுவர் ஸ்தானத்தில் அவர் அமர வைக்கட்டும். நீங்கள் குறிப்பிட்டிருந்த நான்கு நிபந்தனைகளுக்கும் உரிய என் பதில் இது. அடுத்து என்னுடைய நிபந்தனைகளில் சில:

1. விவாதம் நடைபெறுவதை முன்கூட்டியே முடிவு செய்து எல்லா மக்களும் வந்து அதைக் கேட்பதற்கான வாய்ப்புகள் ஏற்படுத்த வேண்டும். குறிப்பிட்ட சிலர் மட்டும் அறியும் வண்ணம் அது அமையக்கூடாது.

2. சம்பந்தப்பட்ட இருவரைத் தவிர வேறு எவரும் பேசக்கூடாது.

3. பேசும் போது ஒருவருக்கொருவர் இடைமறித்துக் கேள்விகள் கேட்க அனுமதிக்க வேண்டும்.

4. இருவரில் எவரேனும் தன்னிடம் இன்னும் பல ஆதாரங்கள் உள்ளது; அதையும் நான் கூறவேண்டும் என்று கேட்கும் போது அதை மறுக்கக்கூடாது.

5. பிரச்சனைகளில் இரு சாராரும் தங்கள் கருத்துக்களை எடுத்து வைக்கக் கால வரம்பு காட்டக் கூடாது. ஒரு சாரார் பேசுவதற்குத் தங்களிடம் ஆதாரம் எதுவுமில்லை என்ற நிலைக்கு வரும் வரை அனுமதிக்க வேண்டும்.

6. எடுத்து வைத்த ஆதாரங்களையே திரும்பத் திரும்ப எடுத்து வைக்கக்கூடாது.

இவை என்னுடைய நிபந்தனைகள். இவற்றில் எதையேனும் சவால் மன்னன் தகுந்த காரணங்களுடன் மறுத்தால் அதையும் பரிசீலிக்கத் தயார். எப்படியேனும் விவாதம் நடந்தாக வேண்டும். இவரது பொய்ப் பிரச்சாத்திற்கு முடிவு கட்ட வேண்டுமென்பதே என் அவா!

இது பி.ஜே. எழுதிய பதில் கடிதம்.

பி.ஜே. அவர்களின் கடித நகலுடன் நிஜாமுத்தீன் மஹ்ழரி 11.12.1988 அன்று ஒரு கடிதம் எழுதி அதை ஸைபுத்தீன் ரஷாதிக்கு அனுப்பி வைத்தார். அதில் பி.ஜே. அவர்களின் கடித வரிகளைக் கோடிட்டுக் காட்டிவிட்டு,

"விவாதம் நடைபெறுவதற்கு ஒரு வாரத்திற்கு முன்பு தங்களுக்குத் தகவல் தர வேண்டும் என்று தாங்கள் குறிப்பிட்டிருந்தீர்கள். இன்ஷா அல்லாஹ் 1989 ஜனவரி இறுதியில் விவாதம் நடைபெற இணைந்து ஏற்பாடுகள் செய்து விடுகிறோம். எனவே தாங்கள் விவாதத்தை உறுதிப்படுத்தும் வகையில் ஒப்புதல் தெரிவித்து அதிகாரப்பூர்வமாகக் கடிதம் ஒன்று எழுதும்படி அன்புடன் வேண்டுகிறேன்''

இவ்வாறு அந்தத் கடிதத்தில் குறிப்பிட்டிருந்தார்.

சுப்ரீம் கோர்ட் பெஞ்ச் (?) ஸைபுத்தீனின் நழுவல் ஃபார்முலா

இதற்கு 21.12.1988 அன்று ஒரு கடிதத்தை ஸைபுத்தீன் பதிலாக அனுப்பினார். மத்ஹபு மாநாட்டில் பேசும் போது, "தேதியை முடிவு செய்து விட்டு என்னைக் கூப்பிடுங்கள்; விவாதத் தலைப்பை நீயே முடிவு செய்; நடுவர் யாரென்று நீயே முடிவு செய். 20 வருட முதர்ரிஸாக இருந்தால் போதும்'' என்றெல்லாம் முழங்கிய ஸைபுத்தீன், நாம் முறைப்படி அழைப்பு விடுத்துக் கடிதம் அனுப்பியதும் தன்னுடைய புரட்டல் வாதத்தை ஆரம்பித்தார். அந்தக் கடிதத்தில் அவர் குறிப்பிட்டிருப்பதைப் பாருங்கள்:

தலைவர் பற்றிய அவர் எழுப்பிய ஐயங்களிலும் ஓரளவு நியாயங்கள் இருக்கத் தான் செய்கின்றன. தர்ஸில் இருந்தவர் என்றால் குர்ஆன், ஹதீஸை நன்கு விளங்கக் கூடியவராக இருக்க வேண்டும். குர்ஆன், ஹதீஸை நன்கு கற்றுக் கொடுத்தவராக இருக்க வேண்டும். குர்ஆன், ஹதீஸ் அடிப்படையில் விவாதம் நடைபெறும் போது அவைகளை விளங்கியவரைத் தான் நடுவராக ஏற்க இயலும்.

தர்ஸ் என்ற வார்த்தையைப் புரட்டல் செய்து, வயதெல்லாம் மீஸான் ஓதிக் கொடுத்தவரையோ, அல்லது கைர முகல்லிதீன்களில் ஒருவரையோ நடுவராகக் கொண்டு வந்தால் அவருக்கு ஏற்படும் ஐயங்கள் எனக்கும் ஏற்படத்தான் செய்யும்.

அவரின் பல விளக்கங்களை, பல முறை பார்த்ததில் அவரிடம் நேர்மையை எதிர்பார்ப்பது "கற்றாழைச் செடியில் கஸ்தூரியின் மணத்தை' எதிர்பார்ப்பதற்கு ஒப்பாகும். எனவே தான் அவரின், "ஒருவரை'' என்ற வார்த்தை கபடங்கள் நிறைந்ததாக இருக்குமோ என்று சந்தேகப்படுகிறேன்.

எனவே விவாதம் இரு தரப்பாருக்கும் ஐயமற்ற முறையில் நடைபெற இப்படியொரு வழியைக் கடைப்பிடிக்கலாம். அதாவது: எங்கள் சார்பாக மேற்படி தகுதிகள் பெற்ற இரண்டு ஆலிம்களையும், அவர்கள் தரப்பில் இரண்டு ஆலிம்களையும் இன்னும் வாத, பிரதிவாதங்களை கிரகிக்கக்கூடிய, மார்க்கப்பற்றுடைய (வேலையில் உள்ள அல்லது ஓய்வு பெற்ற) வழக்கறிஞர் அல்லது நீதிபதி ஒருவர். ஆக ஐந்து பேர் கொண்ட (புல் பெஞ்ச்) ஒரு குழுவை ஏற்படுத்தி, அவர்களில் அந்த நீதிபதியைத் தலைவராகவும் நியமிக்கச் செய்யலாம். கூறப்படும் குர்ஆன், ஹதீஸ்களின் அரபிக்குரிய பொருளை இரு தரப்பு ஆலிம்களும் மேற்படி நீதிபதிக்கு விளக்கட்டும். அவர் இறுதியாகத் தீர்ப்பளிக்கட்டும்.

உதாரணமாக, தொண்டியைச் சேர்ந்த எம்.ஆர்.எம் அப்துல்கரீம் என்ற பெரியவர் இருப்பதாக அறிகிறேன். அவரையோ, அவர் போன்ற வேறொருவரையோ நடுவர் குழுவுக்குத் தலைவராக்கட்டும். யாரை ஏற்படுத்துவது என்றாலும் அவர் இன்னார் என்பதைத் தெளிவாக்கப்பட வேண்டும். நான் "ஒருவரை'' அழைத்து வருகின்றேன் என்ற மூடுமந்திர வேலையைக் காட்டக் கூடாது.

இவ்வாறு ஸைபுத்தீன் தனது கடிதத்தில் எழுதியிருந்தார்.

தேதி குறித்து ஒரு கடிதம்

இதற்குள் நிஜாமுத்தீன் மஹ்ழரி துபை சென்று விட்டதால், பழ்லுல் இலாஹி என்பவர் இதற்குப் பதில் கடிதம் அனுப்பினார். 30.12.1988 அன்று எழுதப்பட்ட அக்கடிதத்தில் கூறப்பட்டதாவது:

நிஜாமுத்தீன் 20.12.88 அன்று துபை சென்று விட்டார்கள். முனாழரா சம்பந்தமாக ஒரு கமிட்டியை அமைத்துச் சென்றுள்ளார். அந்தக் கமிட்டியின் சார்பில் இக்கடிதத்தை எழுதுகிறோம்.

தங்களது 21.12.88 தேதியிட்ட கடிதம் கண்டோம். ஐவர் குழுவை (புல் பெஞ்ச்) ஏற்படுத்த வேண்டும் என்று எழுதியுள்ளீர்கள். தாங்கள் எங்கள் ஊரில் உரையாற்றும் போது, ஒருவரை நடுவராக நியமிக்க வேண்டும் என்று தெரிவித்தீர்கள். நடுவரை அமர்த்துவதில் ஒத்தக் கருத்து இல்லாத பி. ஜைனுல் ஆபிதீன் முனாழரா நடைபெற்றாக வேண்டும் என்பதற்காகவே தங்களின் நிபந்தனையை ஏற்றுக் கொண்டார். தங்கள் கடிதத்தில் குறிப்பிட்டுள்ளபடி, மதனியாகவோ, காலமெல்லாம் மீஸான் ஓதிக் கொடுத்தவராகவோ இல்லாமல் தங்கள் உரையில் குறிப்பிட்டபடி தங்களை விடக் கூடுதலான காலம் (20 வருடங்கள்) அரபிக் கல்லூரியில் பேராசிரியராக, ஸனது பாடங்களை நடத்தியவராக, குர்ஆன் ஹதீஸ்களை நன்கு விளங்கக்கூடிய, தமிழக ஜமாஅத்துல் உலமா சபை ஆலிம்களால் நன்கு அறியப்பட்ட, அனேக ஆலிம்களின் பாராட்டுதலைப் பெற்ற ஒருவரை நடுவராக ஏற்படுத்தினால் தாங்கள் விவாதத்திற்கு வருவீர்களா? என்பதை அறிய விரும்புகிறோம்.

ஒருவரை நடுவராக்க வேண்டும் என்ற தங்கள் முதல் நிபந்தனையின்படி 1989 ஜனவரி 28, 29 ஆகிய இரு தினங்கள் முனாழரா நிகழ்ச்சி நடத்த நாடுகிறோம். தங்கள் பதில் கண்டு நடுவர் யார் என்ற விபரம் தருகிறோம்.

இது நமது தரப்பில் விவாத ஏற்பாட்டுக் குழுவினரால் எழுதப்பட்ட பதில் கடிதம்.

அடுத்த பல்டி

எப்போது வேண்டுமானாலும் தேதியை முடிவு செய்து விட்டு எனக்குத் தெரியப்படுத்துங்கள்; ஒரு வாரத்திற்கு முன்பு எனக்குத் தெரியப்படுத்துங்கள் என்றெல்லாம் சவடால் விட்ட ஸைபுத்தீன் ரஷாதி, தேதியைக் குறிப்பிட்டு நாம் எழுதியவுடன் அந்தக் குறிப்பிட்ட தேதியிலும் அதைத் தொடர்ந்தும் பல்வேறு புரோகிராம்கள் இருப்பதாகப் பீலா விட்டுக் கடிதம் எழுதினார்.

14.01.1989 அன்று அவர் எழுதிய கடிதத்தில்...

விவாதக் கருப்பொருளாகிய 1. தக்லீது, 2. தராவீஹ் பற்றிய ஜைனுல் ஆபிதீன் தனது நிலையை வரையறுத்து எழுத்து மூலம் விளக்க வேண்டும். நான் மேற்படி இரண்டு பொருள்களைப் பற்றிய எனது நிலையை உங்களூர் நிகழ்ச்சியிலேயே விளக்கியுள்ளேன்.

ஐவர் நடுவர் குழு விஷயத்தில் ஜைனுல் ஆபிதீனுக்கு ஆட்சேபணை உண்டு என்றால் மூவர் குழுவாக இருக்கட்டும். இதுவும் அவருக்குச் சம்மதமில்லை என்றால் அவர் குறிப்பிடும் அந்தத் தகுதி வாய்ந்த ஒருவர் யார் என்பதையாவது தெளிவுபடுத்தச் செய்யுங்கள். இருவருக்கும் மத்தியில் தீர்ப்புச் செய்பவர் யார் என்பதைக் கூட மூடி மறைத்து மோடி மஸ்தான் வேலை ஏன் செய்கிறார்?

அடுத்து ஜனவரி 24லிருந்து பிப்ரவரி 10 வரை பல புரோகிராம்கள், சொந்த வேலைகள் இருப்பதால் பிப்ரவரி இறுதியில் ஏற்பாடு செய்யுங்கள். முதலில் மேற்கூறிய இரண்டு விசயங்கள் தெளிவுபடுத்தப்பட வேண்டும்.

இவ்வாறு ஸைபுத்தீன் ரஷாதி எழுதியிருந்தார். இதற்கிடையில் முத்துப்பேட்டையில் மீரா லெப்பை என்பவர் விவாதத்திற்கு அழைத்து ஸைபுத்தீனுக்குக் கடிதம் எழுதுகின்றார். அதற்கு இவர் 22.01.1989 அன்று பதில் எழுதும் போது, மேலப்பாளையத்தில் எந்தக் கடிதப் பரிமாற்றமும் நடைபெறாதது போன்றும், பி.ஜே.வைப் பற்றியே தெரியாதது போன்றும் எழுதுகின்றார்.

நாகர்கோவிலில் ஒரு சந்திப்பு

"எனக்கு என்ன ஆசை என்றால் இவன் எங்கேயாவது சிக்குவான்; நேரே கேட்க வேண்டும்'' என்று மக்கள் முன்னிலையில் முழங்கிய ஸைபுத்தீன், எதிர்பாராத விதமாக 29.01.1989 அன்று நாகர்கோவிலில் பி.ஜே. அவர்களைச் சந்தித்த போது திடுக்கிட்டு ஊமையானார்.

"விவாதம் தொடர்பாக இப்போதே கையெழுத்துப் போடுவோம்'' என்று பி.ஜே. கூறிய போது, நாளைக்கு வருகிறேன் என்று கூறிச் சென்றார். பிறகு, வர முடியவில்லை என்று கடிதம் அனுப்பினார். (இந்தச் சந்திப்பின் போது நடைபெற்ற உரையாடல் விபரத்தை, இக்கட்டுரையின் இறுதியில் இடம்பெற்றுள்ள "இவரைத் தெரிந்து கொள்ளுங்கள்'' என்ற பிரசுரத்தில் பார்வையிடுக!)

எதற்கும் தயார்

தக்லீத், தராவீஹ் நிலைப்பாடு பற்றியும், நடுவர் பற்றியும் விளக்கம் கேட்டு ஸைபுத்தீன் ரஷாதி எழுதிய கடிதத்திற்கு 30.01.1989 அன்று பி.ஜே. எழுதிய பதில் கடிதம்:

தராவீஹ் பற்றிய எனது நிலை? என்ன என்ற கேள்விக்கு நான் அந்நஜாத்தில் ஆசிரியராக இருந்த போது வெளியிட்டது தான் எனது கருத்து. மே 86 இதழின் ஒரு பக்கத்தை இத்துடன் இணைத்துள்ளேன். அதில் அடிக்கோடிடப்பட்டது தான் எனது நிலை. விபரம் போதவில்லையெனில் தெரிவிக்கவும்.

மத்ஹபுகள் அவசியமில்லை, மத்ஹபுகளின் சட்டங்களாகக் கூறப்படுபவைகளில் குர்ஆன், ஹதீசுக்கு முரண்பட்ட மஸாயில்கள் உள்ளன. பல சட்டங்கள் அந்தந்த இமாம்களால் கூறப்பட்டவை அல்ல என்பது எனது நிலை. இதனடிப்படையில் மத்ஹபுகள் அவசியமா? அது கூடுமா? என்பதை முதலிலும், குர்ஆன் ஹதீசுக்கு முரண்பட்டவைகள் என நான் நினைக்கின்ற மஸ்அலாக்கள் இரண்டாவதாகவும், இமாம்களுக்கும் மத்ஹபுகள் என்று சொல்லப்படுபவற்றில் பல மஸ்அலாக்களுக்கும் எந்த உறவும் இல்லை என்பதை மூன்றாவதாகவும் விவாதிக்க எடுத்துக் கொள்ளலாம்.

நடுவராக அன்வாருல் குர்ஆன் ஆசிரியரும், 33 ஆண்டுகள் கூத்தாநல்லூர் மன்பவுல் உலா அரபிக் கல்லூரியில் முதல்வராகப் பணியாற்றியரும், ஏறத்தாழ 70 வயது நிரம்பியவருமான மவ்லவி இ.எம். அப்துர்ரஹ்மான் ஆலிம் அவர்களை நான் தேர்வு செய்கிறேன். நடுவர் பிரச்சனையில் எனக்கு மனப்பூர்வமான சம்மதம் இல்லாவிட்டாலும் எதிர் தரப்பு மவ்லவி அவர்கள் நடுவர் அவசியமென்பதாலும், சில தகுதிகள் உடைய எவரை வேண்டுமானாலும் அழைத்து வரலாம் என்று கேட்டுக் கொண்டதாலுமே இதற்கு நான் சம்மதிக்கிறேன். நடுவரில் நம்பிக்கை இல்லாவிட்டால் நடுவரின்றி விவாதிக்க எனக்கு ஆட்சேபணை இல்லை.

இ.எம். அவர்களை நடுவராக ஏற்றுக் கொள்ள எதிர் தரப்பு சம்மதித்தால் விரைவில் விவாதம் நடத்திடலாம். அதற்கு அவர்கள் சம்மதிக்காவிட்டால் இந்தப் பிரச்சனை தீராது. எவரை நடுவராக நியமித்தாலும், அவர் நமது கருத்தையோ, எதிர் தரப்புக் கருத்தையோ ஏற்பவராக இருப்பது திண்ணம். கடைசி வரை இதிலேயே நமது கடிதத் தொடர்புகள் நீடித்துக் கொண்டிருப்பதைத் தவிர வேறு வழி இருக்காது.

எனவே நடுவரின்றி இரண்டு தரப்பாரும் தத்தமது கருத்துக்களை எடுத்து வைப்போம். மக்கள் முடிவு செய்யட்டும் என்ற நிலை தான் சிறப்பானது. தகராறுகள் ஏற்படாத அளவுக்கு நாம் முன்னேற்பாடுகளைச் செய்து கொண்டால் இதை விடச் சிறப்பான வேறு வழி இராது. இ.எம். அவர்களை எதிர் தரப்பு ஏற்காத போது தான் இந்த நிலை. நீங்கள் யோசித்துக் கொள்க!

இது தான் விவாதத்தின் தலைப்பு பற்றிய நிலைப்பாட்டிற்கும், நடுவர் குறித்தும் பி.ஜே. அவர்கள் எழுதிய கடிதம்.

மீண்டும் அதே பல்லவி

இதனிடையே நாகர்கோவில் சந்திப்பு தொடர்பாக பி.ஜே. அவர்களுக்கு ஸைபுத்தீன் ஒரு கடிதம் எழுதுகின்றார். 08.02.89 தேதியிட்ட அந்தக் கடிதம் இதோ:

அன்புள்ள மௌலவி ஜைனுல் ஆபிதீன் அவர்களுக்கு, அஸ்ஸலாமு அலைக்கும் வரஹ்.. நலம். நலம் பல விளைக.

நாகர்கோவிலில் தற்செயலாக உங்களைச் சந்தித்துப் பேசும் வாய்ப்புக் கிடைத்தது. உங்களின் உபசரிப்பு மனதைக் கவர்ந்தது. ஜஸாக்கல்லாஹ்.

நான் ஹம்ஸா தங்கள் அவர்களைக் கலந்து விட்டு, உங்களைச் சந்திப்பதாகக் கூறி வந்தேன். ஆனால் ஹம்ஸா தங்கள் அங்கு வரவில்லை. எனவே இதுபற்றி ஏதும் முடிவு செய்ய இயலவில்லை. எனவே தான் உங்களை மீண்டும் சந்திக்க முயலவில்லை. போன் மூலம் தகவல் தெரிவிக்க விரும்பினேன். ஆனால் வெகு நேரமாகி விட்டபடியால் தக்கலைக்காரர்களால் ஆவன செய்து தர இயலவில்லை.

ஊர் திரும்பியவுடன் உங்களுக்குத் தபால் எழுத எண்ணினேன்.

ஆனால் தொடர் பிரயாணங்கள் (திருச்சி, திருப்பனந்தாள், அதிராம்பட்டிணம்) சென்று தான் பெங்களூர் திரும்பினேன். மீண்டும் இன்று நாம்நாட் செல்கின்றேன், இன்ஷா அல்லாஹ்.

எனவே உங்களுக்குத் தாமதமாக, அவசரமாக இத்தபாலை எழுதியுள்ளேன்.

இன்னும் ஓரிரு நாட்களில் ஊர் திரும்புவேன். அது பொழுது விவாதம் பற்றிய முடிவை எழுதுகிறேன்.

உடனிருந்த மவ்லவி ஸைபுல்லாஹ், முஹம்மது அலீ, மதனி ஆகியவர்களுக்கு எனது ஸலாம் உரித்தாகட்டும்.

இவ்வாறு அந்தக் கடிதத்தில் ஸைபுத்தீன் கூறியிருந்தார்.

இதனிடையே 04.02.1989 அன்று நமது ஜமாஅத் சார்பில் ஸைபுத்தீன் ரஷாதிக்கு ஒரு கடிதம் அனுப்பப்படுகின்றது. அதில்....

30.01.1989 தேதியிட்ட ஜைனுல் ஆபிதீனின் கடிதம் கண்ட பின் தாங்கள் விவாதிக்கலாம் என்ற முடிவுக்கு வந்து விட்டால் சரி. இல்லையெனில் கடிதத்திலேயே காலம் வீணாவதைத் தவிர்த்து, இம்மாத இறுதியில் ஒன்று, பிரச்சனைக்குரிய தலைப்பில் விவாதம் நடைபெற வேண்டும். அல்லது விவாதம் எப்படி நடக்க வேண்டும் என்பது பற்றிய விவாதம் நடைபெற வேண்டும்.

மேலும் விவாத ஏற்பாட்டில் கலந்து கொள்ளுமாறு கண்ணியத்திற்குரிய மேலப்பாளையம் ஜமாஅத்துல் உலமாவினரை அழைத்தோம். அவர்கள், "விவாதம் செய்யத் தேவையில்லை. எனவே நாங்கள் அதில் ஈடுபட மாட்டோம்'' என்று கூறிவிட்டனர். இன்ஷா அல்லாஹ் எழுத்துப்பூர்வமாக எழுதிக் கேட்போம். பிறகும் மறுத்தால் உங்கள் நிலையில் மாற்றம் இருக்காது என்று நம்புகிறோம்.

விவாதம் மேலப்பாளையத்தில் உள்ள பள்ளிவாசல், கல்யாண மண்டபம், பஜார் திடல் இவற்றில் ஏதேனும் ஒரு இடத்தில் நடைபெறும்.

இவ்வாறு நாம் எழுதிய கடிதத்திற்குப் பிறகு ஸைபுத்தீன் ரஷாதியிடமிருந்து எந்தப் பதிலும் வரவில்லை. இதைத் தொடர்ந்து, "இவரைத் தெரிந்து கொள்ளுங்கள்'' என்ற பிரசுரம் நமது ஜமாஅத் சார்பில் வெளியிடப்பட்டது.

இவரைத் தெரிந்து கொள்ளுங்கள்

ஏகத்துவப் பிரச்சாரம் பல முனைகளிலும் முடுக்கி விடப்பட்டுள்ள நிலையில் சில ஆண்டுகளாக ஒருவர் வாய்ச் சவடாலில் இறங்குவதை வாடிக்கையாக்கி வருகின்றார்.

தன்னுடன் நேரடி விவாதத்திற்கு தவ்ஹீத் மவ்லவிகளை, குறிப்பாக சகோதரர் ஜைனுல் ஆபிதீன் அவர்களைப் பலமுறை அழைத்ததாகவும் தவ்ஹீத் அறிஞர்கள் அதை ஏற்காமல் நழுவுவதாகவும் வாய் கூசாமல் மேடைகளில் பேசி வருகிறார்.

விருதுநகர், திருச்சி, காயல்பட்டிணம், மேலப்பாளையம் என்று பல ஊர்களில் நரகல் நடையில் பொய்களை அரங்கேற்றியுள்ளார். எனவே இவரை இனம் காட்டுவதும், இவரது சவடால் எந்த அளவுக்கு உண்மையானது என்பதை அடையாளம் காட்டுவதும் நமக்கு அவசியமாகின்றது. அவர் தான் பெங்களூரில் உள்ள தாருல் உலூம் ஸபீலுர்ரஷாத் என்ற அரபிப் பாடசாலையில் பேராசிரியராக, பேருக்கு ஆசிரியராக இருக்கும் ஸைபுத்தீன் என்பவர்.

சுன்னத் வல்ஜமாஅத் கூடாரம் கலகலத்துப் போய் மக்கள் இந்தப் பூசாரிகளின் பிடியிலிருந்து விடுபடுவதையும், மதத்தின் பெயரால் கிடைத்து வந்த ராஜமரியாதையும், மார்க்கத்தை வியாபாரம் செய்து பிழைத்து அதன் மூலம் பெற்று வந்த வருமானம் அடிபட்டுப் போவதையும் கண்டு, இவற்றைத் தடுத்து நிறுத்துவதற்காக இத்தகைய சவடால்களை அவர் அள்ளி வீசி வருகின்றார். உண்மை நிலையை அறியாத மக்கள் இவரைப் பற்றி அறிந்து கொள்ள வேண்டும் என்பதற்காக இந்த முதல்கட்டப் பிரசுரம் வெளியிடப்படுகின்றது.

எல்லா ஊர்களைப் போலவே மேலப்பாளையத்திலும் இந்தப் பேர்வழி சவால் விட்டார்.

"அவனை (பி. ஜைனுல் ஆபிதீனை) அழைத்து வா! அட முட்டாள், தைரியமிருந்தால் நேரடி விவாதத்துக்கு வா! எவன் வேண்டுமானாலும் வா! எப்போது வேண்டுமானாலும் வா! எங்கே நடத்துவது? எப்படி நடத்துவது? என்பதை நீயே முடிவு செய்து கொள். நான் வரத் தயார்'' என்றெல்லாம் அநாகரீக நடையில் சவால் விட்டார்.

இவர் இவ்வளவு அழுத்தமாகச் சவால் விடுகிறாரே! இவர் கூறுவது உண்மையாக இருக்குமோ என்று தவ்ஹீத்வாதிகள் கூட எண்ணுமளவுக்கு உறுதிபட விவாதத்திற்குத் தயார் என்று கூறினார். எனவே அதற்கான முயற்சியில் நாம் இறங்குவோம் என்று எண்ணி, அவரை நெருங்கிய போது தான் அவரது சுயரூபம் தெரிய வந்தது.

சகோதரர் பி. ஜைனுல் ஆபிதீன் அவர்களைத் தொடர்பு கொண்டு இதுபற்றிக் கூறிய போது அவர், "நான் எப்போதும் தயார். மக்கள் மத்தியில் வைத்து விவாதிக்க ஏற்பாடு செய்யுங்கள்'' என்று கைப்பட எழுதி ஒப்புதல் வாக்குமூலம் தந்தார்.

அதையும் இணைத்து இவருக்கு எங்கள் சார்பில் கடிதம் அனுப்பினோம். எங்கள் கடிதத்தில், விவாதிக்கப்படும் விஷயங்கள், விவாதிக்கப்படும் நாள், விவாதம் நடக்கும் இடம் எல்லாவற்றையும் நாங்களே முடிவு செய்து அனுப்பினோம். ஏனென்றால் அதை முடிவு செய்யும் பொறுப்பை மேடையில் எங்களிடமே அவர் ஒப்படைத்திருந்தார்.

இந்தக் கடிதத்திற்கு அவரிடமிருந்து மழுப்பலும் நழுவலும் தான் பதிலாகக் கிடைத்தது. அந்தக் குறிப்பிட்ட தேதியில் அவர் வராததால் வால் போஸ்டர் மூலமும் பொதுக்கூட்டம் மூலமும் மேலப்பாளையம் மக்களிடம் பிரகடனம் செய்தோம். மேலும் ஸைபுத்தீனை விவாதத்திற்கு அழைத்து வருபவர்களுக்குப் பரிசு வழங்கப்படும் என்றும் சுவரொட்டிகள் மூலம் தெரிவித்தோம்.

இன்று வரை எவரும் அவரை அழைத்து வர முடியவில்லை. பரிசுத் தொகை ரூபாய் 5000 அப்படியே உள்ளது. இதன் பிறகு மேலப்பாளையம் மக்கள் இந்தப் பிராடு பேர்வழியை சரியாகப் புரிந்து கொண்டார்கள். வாங்குகின்ற தொகைக்காகக் கத்தி விட்டுப் போகும் மார்க்க வியாபாரி என்பதைப் புரிந்து கொண்டனர்.

இதன் பிறகு இவருக்குத் தக்கலையில் ஒரு பொதுக்கூட்டம் ஏற்பாடு செய்யப்பட்டிருந்தது. அதற்காக அவர் வரும் போது நாகர்கோவிலில் இறங்கி பள்ளிவாசலுக்குச் சென்றார். அந்தப் பள்ளியில் தான் நமது அரபிக் கல்லூரியும் அல்ஜன்னத் அலுவலகமும் இருந்தது என்பதை அவர் அறியவில்லை. நாகர்கோவில் கலாச்சாரப் பள்ளிக்கு அவர் வந்ததும் பி. ஜைனுல் ஆபிதீன் அவர்கள் அவருடன் அன்புடன் பேசி தனது அறைக்கு அழைத்துச் சென்றார்.

பல்வேறு விஷயங்கள் பேசப்பட்டன. முடிவில் மேலப்பாளையத்தில் அவர் விட்ட சவால் பற்றி பி. ஜைனுல் ஆபிதீன் பேச்சைத் துவக்கினார்.

"உங்கள் சவாலை நான் ஏற்கிறேன். இங்கேயே நாம் பேசி விவாதத்தின் தலைப்பு, விவாதம் செய்யும் நாள், விவாதம் நடக்கும் விதம் எல்லாவற்றையும் கலந்து பேசி ஒரு ஒப்பந்தம் எழுதிக் கொள்வோம். அதன் பிறகு மக்களிடம் அந்த ஒப்பந்தத்தின் அடிப்படையில் விளம்பரம் செய்வோம்'' என்று பி. ஜைனுல் ஆபிதீன் கூறினார்.

அதற்கு இந்தப் பிராடு பேர்வழி அளித்த பதில் என்ன தெரியுமா? "நான் தயார் தான். ஆனாலும் நெல்லை மாவட்ட ஜ.உ. சபை இதை விரும்பவில்லை. அவர்கள் விரும்பாத போது எப்படிக் கலந்து கொள்வது?'' என்று கேட்டார்.

அப்போது அருகிலிருந்து சகோதரர் அப்துல் அஜீஸ் அவர்கள், "இந்தச் சவால் விடுவதற்கு முன் நீங்கள் ஜ.உ. சபை சார்பாக சவால் விடவில்லை. ஸைபுத்தீனாகத் தான் சவால் விட்டீர்கள். இப்போது இப்படிப் பேசுவது முறையில்லை'' என்று கூறினார்.

"எனக்குப் பெரியவர்கள் அதை விரும்பாத போது நான் எப்படிக் கலந்து கொள்ள முடியும்? வேண்டுமானால் தக்கலைக்கு ஜ.உ. சபையின் தலைவர்கள் கலந்து கொள்ள வருகிறார்கள். அவர்களிடம் கலந்து பேசி நாளை வருகிறேன்'' என்றார்.

இத்தனை காலம் கடந்த பிறகும் இவருக்கு "நாளை' வரவில்லை போலும்.....

இவரைத் தெரிந்து கொள்ளுங்கள் என்ற தலைப்பில் நாம் வெளியிட்டிருந்த பிரசுரம் இது தான்.

இதற்குப் பிறகு ஒரு நீண்ட தொய்வு.

ஸைபுத்தீன் ரஷாதியிடமிருந்து எந்தக் கடிதமும் வரவில்லை. ஆனாலும் நாம் விடாது துரத்திக் கொண்டு இருந்தோம். ஒரு இடைவெளிக்குப் பின் மீண்டும் ஒரு கடிதம் அனுப்புகின்றோம்.

அதன் விபரத்தை இன்ஷா அல்லாஹ் அடுத்த இதழில் காண்போம்.

அரங்கேறிய பொய்கள் அம்பலமான பித்தலாட்டங்கள்

விவாத சவடால் விடுவதும் விவாதத்திற்கான ஏற்பாட்டைச் செய்ய முன் வந்தால் தலைதெறிக்க ஓடுவதும் அதன்பின் "இவர்கள் ஓடிவிட்டார்கள்' என்ற தலைப்பில் நாடகம் நடத்துவதும் ஸைபுத்தீன் ரஷாதியின் அன்றாட பணிகளாகும்.  இப்பணியை செவ்வனே நிறைவேற்றி வந்த ஸைபுத்தீன் ரஷாதி, மரைக்காயர் பட்டிணத்தில் ஒரு நிகழ்ச்சிக்காக வந்திருந்த போது வழக்கம் போல தனது விவாத நாடகக் காட்சியை அரங்கேற்றவும், அப்பகுதியிலுள்ள நமது ஜமாஅத் சகோதரர்கள் அவரை கோழிக்குஞ்சை அமுக்குவது போன்று மடக்கி விவாத ஒப்பந்தத்திற்கு வழிவகுத்தார்கள். 

ரஷாதியின் முகத்திரையைக் கிழித்தெறிய விவாதம் கண்டிப்பாக நடைபெற வேண்டும் என்ற நோக்கம் நமக்கு இருந்ததால், ரஷாதி விதித்த நிபந்தனைகளில் "விவாதத்தில் பி.ஜே மட்டும் தான் பேச வேண்டும்' என்பது உள்ளிட்ட பல்வேறு நிபந்தனைகளை ஏற்று, 101 தலைப்புகளில் விவாதம் நடைபெறுவதாக ஒப்பந்தமானது. அதனடிப்படையில் திருச்சியில் கடந்த பிப்ரவரி 2, 3, 4 ஆகிய தினங்களில்,

இஜ்மா மார்க்க ஆதாரமாகுமா?

மார்க்கம் சொல்வதில் பி.ஜே பொய்யரா? ஸைபுத்தீன் ரஷாதி பொய்யரா?

ஆகிய இரு தலைப்புகளில் விவாதம் இறையருளால் இனிதே நடை பெற்றது.

இவ்விவாதத்தில் எந்த ஒரு தலைப்பிலும் தனது கருத்தை ரஷாதியால் தக்க ஆதாரத்துடன் நிலைநாட்ட இயலவில்லை. அதிலும் முதல் தலைப்பான இஜ்மா மார்க்க ஆதாரமாகுமா? என்பதில் இஜ்மா மார்க்க ஆதாரம் என்பதற்குக் குர்ஆனிலும், ஹதீஸிலும் ஆதாரங்கள் கிடையாது என்பதைத் தனது வாயாலேயே ஒப்புக் கொண்ட பரிதாபமும் நடந்தது.

இரண்டாம் தலைப்பான மார்க்கம் சொல்வதில் பி.ஜே. பொய்யரா? ஸைபுத்தீன் ரஷாதி பொய்யரா? என்பதில் பி.ஜேவின் முரண்பாடுகள் என்ற பெயரில் அவர் முன்வைத்த அத்தனை சொத்தை வாதங்களுக்கும் தகுந்த பதில் அளிக்கப்பட்டது. அது மட்டுமின்றி விவாதக் களத்தில் அவர் பேசிய பேச்சிலிருந்தே முரண்பாடுகளின் மொத்த உருவம் தான் ஸைபுத்தீன் ரஷாதி என்பதையும், மார்க்கம் சொல்வதில் ரஷாதி துணிந்து பொய்களை சொல்லக்கூடியவர் என்பதையும் இறையருளால் சந்தேகமற நிரூபிக்கப்பட்டது.

மார்க்கம் சொல்வதில் ரஷாதி ஒரு பொய்யர், கொஞ்சமும் மன உறுத்தலின்றி நபிகளாரின் மீதே பொய், புளுகு மூட்டைகளை அவிழ்த்து விடுபவர் என்பதற்கான ஆதாரங்களை, விவாதக் களத்தில் பி.ஜே. அவர்கள் முன்வைத்து நிரூபித்த ஆதாரங்களை முதலில் தொகுத்து வழங்குகிறோம்.

அதற்கு முன் மார்க்கம் சொல்வதில் பொய்யுரைப்பவரைப் பற்றி மார்க்கம் சொல்வதென்ன என்பதை அறிவோம்.

நபியின் மீது பொய்

நபி (ஸல்) அவர்கள் மீது ஒருவர் பொய் சொல்வது அவர் நரகில் நுழைவதற்குப் போதுமான ஒன்றாகும்.

நபி (ஸல்) அவர்கள் கூறினார்கள்:

(நான் சொல்லாததை நான் சொன்னதாக) என் மீது பொய் சொல்லாதீர்கள். ஏனெனில், என் மீது  பொய்யுரைப்பவன் நிச்சயம் நரகத்தில் நுழைவான்.

அறிவிப்பவர்: அலீ (ரலி),

நூல்: புகாரி 106

அல்லாஹ்வின் தூதர் (ஸல்) அவர்கள் கூறினார்கள்:

என் மீது கூறும் பொய் (உங்களில்) ஒருவர் மீது கூறும் பொய்யைப் போன்றதன்று.  யார் என் மீது வேண்டுமென்றே பொய்யுரைக்கின்றானோ அவன் தன் இருப்பிடத்தை நரகத்தில் ஆக்கிக்கொள்ளட்டும்.

அறிவிப்பவர்: முகீரா (ரலி)

நூல்: புகாரி 1291

ஒருவர் நபிகளாரின் மீது பொய் சொல்வாரேயானால் அதுவே அவரை நரகிற்கு இழுத்துச் செல்லும் என்று மார்க்கம் சொல்கிறது.

நபிகளாரின் இந்த எச்சரிக்கையைக் கொஞ்சமும் கண்டு கொள்ளாமல் சகட்டு மேனிக்கு வாயில் வந்ததையும் கண்ணில் கண்டதையும் நபியின் பெயரைப் பயன்படுத்திப் பொய்யுரைப்பதைத் தனது வாடிக்கையாகவே கொண்டிருப்பவர் இந்த ரஷாதி. விவாதக் களத்தில் ரஷாதியின் இந்த முகமூடி எப்படிக் கிழிந்தது என்பதை இனி அறிவோம்.

உறுதிப்படுத்திய ஊமை ஷைத்தான்

நபிகள் நாயகம் கூறாததை, நபிகள் நாயகம் கூறினார்கள் என்று மக்களுக்கு மத்தியில் திட்டமிட்டுப் புனைந்து, அசட்டு தைரியத்தோடு ரஷாதி சொல்லிய பல புருடா செய்திகளை (வீடியோ கிளிப்ஸ்) அவர் பேசிய ஐந்தாறு குறுந்தகடுகளிலிருந்து இரண்டாம் தலைப்புக்காக நாம் ஏற்கனவே எடுத்து வைத்திருந்தோம்.

இந்நிலையில் முதல் தலைப்பில் முதல் நாளன்று இஜ்மா தொடர்பாக விவாதம் நடைபெற்றுக் கொண்டிருக்கும் போது பொய்யர் ரஷாதி  "ஸஹாபாக்கள் ஒரு சட்டத்தை இயற்றி அது தவறாக இருந்திருந்தால் ஏனையோர் மௌனமாக இருக்க மாட்டார்கள்'' என்று சொல்லி பின்வருமாறு ஒரு ஹதீஸ் இருப்பதாக சொன்னார்.

"(தீமை நடைபெறும் போது) யார் சத்தியத்தைச் சொல்லாது மௌனம் காக்கிறானோ அவன் ஊமை ஷைத்தான் ஆவான்'' என நபிகள் நாயகம் கூறினார்கள்.

இந்த ஹதீஸை (?) சொல்லி ஸஹாபாக்கள் இந்த ஊமை ஷைத்தானுடைய செயலைச் செய்வார்களா? என்று பேசும் ஷைத்தான் கர்ஜித்தார்.

(ரஷாதியின் இக்கேள்விக்கும், மௌனமாக இருப்பது மட்டுமே அங்கீரமாகுமா? என்பதற்கும் விரிவான முறையில் பதில் அளிக்கப்பட்டது)

இச்செய்தியின் கருத்து சரியாக இருந்தாலும் நபியின் பெயரைப் பயன்படுத்திச் சொல்வதாக இருந்தால் உண்மையில் உறுதியான செய்தியின் அடிப்படையில் தான் சொல்லவேண்டும்.

ரஷாதிக்கு அதைப் பற்றியெல்லாம் துளியும் அக்கறை இல்லை என்பதை நாம் நன்கு அறிந்ததால் இப்படியொரு செய்தியை நபிகள் நாயகம் கூறியுள்ளார்களா? என்று பார்த்த போது நபிகள் கூறியதாக ஒரு பலவீனமான செய்தி கூட இல்லை என்பது உறுதியானது. ஏன்? இச்செய்தியை ஸஹாபாக்கள் கூறியதாகக் கூட இல்லை.

மாறாக அபூ அலி என்ற கவிஞர் கூறியதாகத் தான் இச்செய்தி உள்ளது.

 (தீமை நடைபெறும் போது) யார் சத்தியத்தைச் சொல்லாது மௌனம் காக்கிறானோ அவன் ஊமை ஷைத்தான் ஆவான் என அபூ அலி தகாக் கூறினார்.

நூல்: ரிஸாலதுல் குஷைரி, பாகம் 1, பக்கம் 57

இதைத் தான், "நபியவர்கள் சொன்னார்கள்' என்று புருடா விட்டுள்ளார்.

இந்த இடத்தில் ஒரு விஷயத்தை நாம் சிந்தித்துப் பார்க்க வேண்டும்.

விவாதக் களம் என்பது சாதாரண ஒன்றல்ல, பல அறிஞர் பெருமக்கள், பொதுமக்கள் கூடியிருக்கிற சபையாகும். அது மட்டுமின்றி நேரலை மூலமாக உலகின் பல பகுதியிலிருந்தும் ஆயிரக்கணக்கானோர் பார்த்துக் கொண்டும் உள்ளனர். இந்த இடத்தில் ஒரு கருத்தைச் சொல்வதாக இருந்தால் தீர ஆராய்ந்து சொல்ல வேண்டும் அல்லவா?

இப்படியொரு இடத்தில் அல்லாஹ்வின் பயமும் இல்லாமல், சபையோர் பயமும் இன்றி, நபியவர்கள் சொல்லாததை நபி சொன்னார் என்று நா கூசாமல் சொல்வாரேயானால் எவ்வளவு நெஞ்சழுத்தமுள்ளவராக இருக்க வேண்டும்? ஏனைய பொதுமக்களுக்கு மத்தியில் இது போன்று எத்தனை சொந்தச் சரக்குகளை ஹதீஸ்களாகச் சொல்லியிருப்பார் இந்த ரஷாதி? என்பதை அறிவுடையோர் சிந்திக்க வேண்டும்.

அந்தர் பல்டிகளும் ஆகாசப் புளுகுகளும்

இச்செய்தியை நபிகள் நாயகம் கூறியதாகக் கூறுவது திட்டமிட்ட பொய். நபிகளார் இவ்வாறு கூறினார்கள் என்பதை ஆதாரத்துடன் நிரூபிக்க முடியுமாஎன்று நாம் கேள்வி எழுப்ப உடனே அடித்தாரே பார்க்கலாம் அந்தர் பல்டி.

ஸஹாபாக்கள் சொன்னார்கள் என்று உள்ளது, அதைத் தான் நபிகள் சொன்னதாகக் கூறிவிட்டேன் என்றார் முதலில்.

"இதைக் கூறிய ஸஹாபி யார்? அவர் ஸஹாபி இல்லையே!' என்று நாம் மடக்கியபோது, "இல்லையில்லை, அவர் ஸஹாபியில்லை, ரழியல்லாஹு அன்ஹு என்று எழுதியிருந்ததால் எனக்கு ஸஹாபி போன்று தெரிந்தது. அதனால் ஸஹாபி என நினைச்சு சொன்னேன்' என்று ரஷாதியிடத்தில் அடுத்த பல்டி.

உண்மையில் ரழியல்லாஹு அன்ஹு என்று அந்தப் புத்தகத்தில் இல்லை, அச்செய்தியை அவரது ஆட்கள் கைப்பட எழுதும் போது குறிப்பிட்ட பெயருடன் சேர்த்து ரழியல்லாஹு அன்ஹு என்று எழுதி விட்டார்கள். அப்படிக் கைப்பட எழுதிய பேப்பரைத் தான் நம்மிடமும் தந்தார்கள். இதை வைத்துத் தான் ஸஹாபி என்று நினைத்தாராம்.

அடுத்து, "நபிகளார் சொன்னார்கள் என்று ஹதீஸ் உள்ளது தெரியும்; ஆனால் எங்கு உள்ளது என்று முதலில் தெரியவில்லை. இப்போது தேடிப் பார்த்தேன். இதோ ஹதீஸ் உள்ளது' என்று ஃபிக்ஹ் சுன்னாவில் உள்ளதையும், கஷ்புல் அஸ்ராரில் உள்ளதையும் மறுநாள் மேற்கோள் காட்டினார்.

அதில், "நபிகள் நாயகம் கூறியதாகச் சொல்லப்படுகின்றது' என்று தான் உள்ளது, ஹதீஸ் என்று சொல்லத் தகுந்த, முழுமையான அறிவிப்பாளர் தொடர் அதில் இல்லை, இதைத் தான் ஆதாரமாகக் காட்டினார். பிறகு அதிலிருந்தும் பின்வாங்கினார். இப்படி ஊமை ஷைத்தான் விஷயத்தில் பலவாறாகப் பல அந்தர் பல்டிகள் அடித்தார்.

இவர் ஹதீஸ்களைப் பார்த்து உறுதி செய்து விட்டுப் பிறகு சொல்பவர் அல்ல, வாயில் வந்ததை நபிகளார் பெயரில் சொல்லி விட்டுப் பிறகு அப்படி ஹதீஸ் இருக்கிறதா என்று தேடிப் பார்ப்பவர் என்ற ரஷாதி பற்றிய நமது நிலைப்பாட்டை இந்த ஊமை ஷைத்தான் சம்பவம் உறுதி செய்தது.

மேலும் அவர் செய்த தவறை உள்ளங்கை நெல்லிக்கனியாய் அவருக்கு விளக்கினாலும் அதை ஏற்றுக் கொள்ளும் மனப்பக்குவம் சிறிதும் அவருக்கு இல்லை என்பதும் வெளிப்பட்டது.

தான் சொன்ன பொய்யை உண்மையாக்குவதற்காக அறிவிப்பாளர் தொடர் ஏதுமில்லாமல் உள்ள பொய்யைக் கூட தனக்கு ஆதாராமாகக் காட்டும் கீழ் நிலைக்குச் செல்வார் என்பதையும் இது உணர்த்தியது.

இரண்டாவது பொய்

ஊமை ஷைத்தான் சம்பவத்தை அடுத்து, நாம் ஏற்கனவே வைத்துள்ளநபிகளார் மீது ரஷாதி இட்டுக்கட்டியிருந்த பொய் மூட்டைகளிலிருந்து ஒவ்வொன்றாகப் போட்டோம். பொதுவாக ரஷாதியின் இது போன்ற பொய்யான செய்திகள் யாவும் வெளிநாடுகளில் அவர் ஆற்றிய உரைகளில் அதிகமாகவே காணப்படுகின்றது. அது போன்ற  ஒரு உரையில் நபிகளாரின் குடும்பத்தாரை நேசிப்பதைப் பற்றிச் சொல்லும் போது ரஷாதி அள்ளிவிட்ட பொய் பின்வருமாறு:

ஒரு மனிதர் நபிகள் நாயகத்திடம் வந்து மறுமை நாளைப் பற்றிக் கேட்கும் போது நபிகள் நாயகம், "நீ அதற்காக என்ன தயாரித்து வைத்திருக்கிறாய்?' என்று கேட்க அம்மனிதர், "நாயகமே நான் உங்களையும் உங்கள் குடும்பத்தாரையும்  நேசிப்பதைத் தவிர பெரிதாக ஒரு தயாரிப்பும் என்னிடம் இல்லை' என்கிறார். அதற்கு நபிகளார், "நீ யாரை நேசிப்பாயோ மறுமை நாளில் அவருடன் இருப்பாய்' என்று கூறினார்கள்.

இதன் அரபி வாசகங்களை எல்லாம் சொல்லி நபிகளாரின் குடும்பத்தாரை நேசிப்பது சொர்க்கத்திற்கு அழைத்துச் செல்லும் என்று ரஷாதி பேசுகிறார்.

ரஷாதி சொன்ன இச்சம்பவத்தை வீடியோ கிளிப் ஆதாரத்தோடு எடுத்துக் கூறி இப்படி ஒரு ஹதீஸ் இல்லை; இருந்தால் இதற்கான ஆதாரத்தைத் தாருங்கள் என்று விவாதக் களத்தில் கேட்டோம்.

அதற்கு ரஷாதி, நபியின் குடும்பத்தாரை நேசிப்பது பற்றிய பொதுவான செய்திகளை எடுத்துத் தந்தாரே ஒழிய நபியின் குடும்பத்தாரை நேசிப்பது பற்றி அவர் எந்தப்  பொய்யான செய்தியைக் குறிப்பிட்டாரோ, மேற்கண்ட அந்தச் செய்திக்குரிய ஆதாரத்தை அவரால் விவாத இறுதி வரை எடுத்து தர முடியவே இல்லை.

இதில் கவனிக்க வேண்டிய அம்சம், நபியின் குடும்பத்தாரை நேசிக்க வேண்டும் என்பதில் நமக்கு மாற்றுக் கருத்தில்லை. நாம் முன்னரே குறிப்பிட்ட படி ஒரு சம்பவத்தை நபியின் பெயரில் சொல்வதாக இருந்தால் அதற்குத் தகுந்த ஆதாரம் இருக்க வேண்டும். இவர் குறிப்பிட்டதற்குத் தகுந்த எவ்வித ஆதாரமும் இல்லை.

ஆனால் இவர் குறிப்பிடுவது போன்ற வேறொரு செய்தி புகாரியில் பின்வருமாறு உள்ளது.

கிராமவாசிகüல் ஒருவர் நபி (ஸல்) அவர்கüடம் வந்து, "அல்லாஹ்வின் தூதரே! மறுமை நாள் எப்போது சம்பவிக்கும்?'' என்று கேட்டார். நபி (ஸல்) அவர்கள், "உனக்கென்ன கேடு! அதற்காக நீ என்ன முன்முயற்சி செய்துள்ளாய்?'' என்று  கேட்டார்கள். அவர் "நான் அதற்காக (ஏதும்) முன்முயற்சி செய்யவில்லை; ஆயினும், நான் அல்லாஹ்வையும் அவனுடைய தூதரையும் நேசிக்கிறேன்'' என்று பதிலüத்தார். நபி (ஸல்) அவர்கள், "(அப்படியானால்) நீ யாரை நேசிக்கின்றாயோ அவர்களுடன் (மறுமையில்) இருப்பாய்!'' என்றார்கள். உடனே நாங்கள், "நாங்களும் அவ்வாறுதானா?'' என்று கேட்டோம். நபி (ஸல்) அவர்கள், "ஆம்'' என்று சொன்னார்கள். (இதைக் கேட்டு) அன்று நாங்கள் மிகவும் மகிழ்ந்தோம்.

அறிவிப்பவர்: அனஸ் (ரலி),

புகாரி 6167

நபிகள் நாயகத்திடம் வருகின்ற மனிதர், "நான் அல்லாஹ்வையும் அவனது தூதரையும் நேசிக்கின்றேன்' என்று சொன்னதாகத் தான் புகாரி, முஸ்லிம் உள்பட அனைத்து ஹதீஸ் கிரந்தங்களிலும் உள்ளது. ஆனால் இந்த ஸைபுத்தீன் ரஷாதி இந்த ஹதீஸை அப்படியே தனது கருத்திற்குத் தோதுவாக திரித்து, ஹதீஸில் இல்லாத வாசகங்களைச் சேர்த்து, "நாயகமே! நான் உங்களையும் உங்கள் குடும்பத்தாரையும்  நேசிக்கின்றேன்' என்று வேண்டுமென்றே நபியின் பெயரில் புனைந்து சொல்லியுள்ளார்.

இச்செய்தியை எடுத்துக் காட்டுங்கள் என்று கேட்டுக் கொண்டே இருந்தும் விவாத இறுதி வரை எந்தப் பதிலும் இல்லை.

தனது சொந்தச் சரக்கை நபியின் மீது இட்டுக்கட்டிச் சொல்வது இவருக்கு ஒரு பொருட்டே இல்லை என்பதும், அதை ஹதீஸ் என்று எண்ண வைப்பதற்காக அரபி வாசகங்களை எல்லாம் சொல்லி சினிமா நடிகர்களை மிஞ்சிய நடிப்பை வெளிப்படுத்துவார் என்றும், இதற்கு அவர் விவாதத்தில் பதிலளிக்காமல் பல் இளித்ததிலிருந்து அறிவுடைய மக்கள் புரிந்து கொண்டனர்.

மூன்றாவது பொய்

ஸைபுத்தீன் ரஷாதி ஒரு உரையின் போது அன்பளிப்பை பற்றிப் பேசுகிறார். நமக்கு வழங்கப்படும் அன்பளிப்பை மறுக்க கூடாது என்ற கருத்தைக் குறிப்பிடும் போது, தனது கருத்துக்கு வலுசேர்க்கும் விதமாக நபிகள் நாயகத்தின் பெயரால் மற்றுமொரு பொய்யை கட்டவிழ்த்து விடுகிறார்.

"எதிர்பாராமல் வரும் அன்பளிப்பை மூன்று முறைக்கு மேல் மறுக்க கூடாது. மறுத்தால் இறைவனின் ரிஸ்க் தடையாகிவிடும்'' என்று ஹதீஸ்களின் கருத்தை பெரியவர்கள் எடுத்துக் கூறுகிறார்கள் என்கிறார்.

இதன் ஆதார வீடியோ கிளிப்பை ஓடச் செய்து, அன்பளிப்பை மூன்று முறைக்கு மேல் மறுக்கக்கூடாது என்ற நபிகளாரின் ஹதீஸை எடுத்துக்காட்ட முடியுமா? என்று கேட்டோம்.

அவர் மானமுள்ளவராக, உண்மையாளராக இருந்திருந்தால் தன்னை நபியின் மீதே பொய் சொல்வதாகக் குற்றம் சாட்டுகிறார்களே? நான் அப்படிப்பட்டவன், இல்லை இதோ நான் பேசியதற்கான ஆதாரம் என்று அப்படி ஒரு ஹதீஸைக் காட்டியிருக்க வேண்டும்.

ஆனால் இறுதி வரை இதைப்பற்றி மூச்சுக் கூட விடவில்லை என்பது ஸைபுத்தீன் ரஷாதியின் சிறப்புத் தன்மை! இந்த அன்பளிப்பு விவகாரத்திலும் நபியின் மீது பொய் சொல்வது தனக்குக் கை வந்த கலை என்பதை ரஷாதி சந்தேகமற நிரூபித்தார்.

நான்காவது பொய்

நபிகள் நாயகத்தின் மீது ரஷாதி இட்டுக்கட்டும் அடுத்த பொய்யைப் பார்ப்போம்.

"அல்லாஹ்வின் பண்புகளை எடுத்துக் கொள்ளுங்கள் என நபிகள் நாயகம் கூறினார்கள்'' என்று ஒரு உரையில் ரஷாதி கூறுகிறார்.

இந்த வீடியோ கிளிப்பை ஒளிபரப்பி, "இந்த ஹதீஸ் எங்கு உள்ளது? ஆதாரத்தைத் தாருங்கள்' என்று கேட்டோம். காரணம், இப்படி ஒரு ஹதீஸ் முழுமையான அறிவிப்பாளர் தொடருடன் எந்த நூலிலும் பதிவு செய்யப்படவில்லை, ஒரு பலவீனமான ஹதீஸ் கூட இல்லை.

மேலும் அல்லாஹ்வின் பண்புகளை நாம் எப்படி எடுத்து வாழ முடியும்? அல்லாஹ்வுக்குத் தூக்கமில்லை, சோர்வு இல்லை, பசியில்லை, பலவீனமில்லை, குடும்பமில்லை. இத்தகைய பண்புகளைக் கொண்ட இறைவனைப் போன்று நம்மால் வாழமுடியுமா?

அவனைப் போல் எதுவும் இல்லை. (அல்குர்ஆன் 42:11) என்று திருக்குர்ஆன் கூறுகின்றது. இப்படியிருக்கும் போது, இத்தகைய கருத்தை எப்படி நபிகள் நாயகம் கூறியிருப்பார்கள்?

எனவே இதுவும் ரஷாதியின் சித்து வேலைகளில் ஒன்று என்பதை உறுதியாகப் புரிந்து கொண்டு தான் இதற்கான ஆதாரத்தைத் தாருங்கள் என கேட்டோம்.

ஆதாரம் என்று அவர் தரப்பிலிருந்து தரப்பட்ட பிரிண்ட் பேப்பரைப் பார்த்தால் ஏதோ ஒரு புத்தகத்தின் பொருளடக்கம் தான் இருந்தது, அதாவது அந்தப் புத்தகத்தில் எத்தனை பக்கங்கள், பகுதிகள் உள்ளது, அதன் ஆசிரியர் யார், பதிப்பகம் யாருடையது உள்ளிட்ட விபரங்கள் இருந்ததே தவிர குறிப்பிட்ட ஹதீசுக்கும் இதற்கும் துளியும் சம்பந்தமில்லை.

ஆதாரம் என்ற பெயரில் இப்படி சிறுபிள்ளைத்தனமான, மூளைக்குச் சம்பந்தமில்லாத செயலைச் செய்தாரே தவிர நாம் கேட்ட ஆதாரத்தை அவர் தரவில்லை. நாம் கேட்ட இக்கேள்விக்கு முறையான எந்தப் பதிலும் இறுதி வரை அவரிடம் இல்லை.

இங்கே ஒரு மார்க்க அறிஞருக்கு இறைவன் கூறிய இலக்கணத்தை நினைவுபடுத்த விரும்புகிறோம்.

அல்லாஹ்வின் அடியார்களில் அவனை அஞ்சுவோர் அறிஞர்களே. அல்லாஹ் மிகைத்தவன்; மன்னிப்பவன்.

அல்குர்ஆன் 35:28

இறை பயத்தை முன்னிறுத்தி தமது வாழ்வை, பிரச்சாரத்தை அமைப்பது மார்க்க அறிஞரின் இன்றியமையாத கடமை. நபிகள் நாயகம் கூறினார்கள் என்று ஒரு ஹதீஸைச் சொல்வதாக இருந்தால் அது ஆதாரப்பூர்வமானதா? இது நபிகள் நாயகத்தின் கண்ணியத்தைக் காக்கக் கூடியதா என்றெல்லாம் நாம் ஆய்வு செய்து சொல்லிக் கொண்டிருக்கும் வேளையில், இந்த ஸைபுத்தீன் ரஷாதியோ கண்டதையெல்லாம் ஹதீஸ் என்று துணிந்து  ஊரெல்லாம் சொல்லிக் கொண்டிருக்கிறார் என்றால் இவரிடம் இறை பயமுள்ளதா? இதுதான் மார்க்க அறிஞருக்கான இலக்கணமா?

இறைவனுடைய பயமில்லாமல் வாயில் வந்ததையும் கேள்விப்பட்டதையும் நபிகள் நாயகத்தின் மீதே இட்டுக்கட்டி பொய் சொல்லத் துணிந்து விட்ட இவர் மார்க்கம் சொல்லத் தகுதி பெற்றவரா? என்பதை மக்கள் புரிந்து கொள்ள வேண்டும்.

இன்னும் பொய்கள் அம்பலமாகும் இன்ஷா அல்லாஹ்

கேள்வி பதில்

? சூழல் காரணமாக ஓர் இறைமறுப்பாளரை ஆட்சித் தலைவராக ஏற்றுக் கொள்ள வேண்டிய நிர்ப்பந்தம் வந்தால் ஜெயலலிதாவையோ கருணாநிதியையோ ஆதரிப்பது தவறில்லை என்கிறீர்கள். சரி, அதே போல உலகில் எங்காவது ஒரு பகுதியில் கிலாஃபத் இறையாட்சி ஆட்சி ஏற்பட்டால் அதை ஆதரிப்பீர்களா?

அனீஸ் அஹமது

ஒரு ஆட்சியை கிலாபத் என்றும் இறையாட்சி என்றும் அவர்களே சொல்லிக் கொண்டால் அது சரியான ஆட்சியாகிவிட முடியாது. அது இஸ்லாமிய ஆட்சியாகவும் முடியாது.

இஸ்லாமிய ஆட்சி என்றால் இஸ்லாமிய சட்டதிட்டங்களை வளைந்து கொடுக்காமல் அப்படியே பின்பற்றுவதாகும். இப்படிப்பட்ட ஆட்சி இன்று உலகத்தில் எந்த நாட்டிலும் இல்லை. இஸ்லாமிய நாடுகள் என்று தங்களைச் சொல்லிக் கொள்ளும் நாடுகளிலும் இல்லை.

இஸ்லாத்திற்கும் தங்களுக்கும் சம்பந்தமில்லை என்ற அடிப்படையில் இஸ்லாமிய ஒழுங்கு முறைகளையும் நெறிமுறைகளையும் மீறி நடப்பவர்கள் இஸ்லாமிய ஆட்சிக்கு அழைப்பு விட்டால் அந்த அழைப்பு பொய்யானது, போலியானது. இவர்களை நம்பி இவர்களுக்குப் பின்னால் செல்லக் கூடாது. இந்த அழைப்பை விடுவதற்கு இவர்களுக்கு எள்ளளவு கூட தகுதி இல்லை.

முறையான இஸ்லாமிய ஆட்சி இறுதி காலத்தில் தான் ஏற்படும் என்று நபி (ஸல்) அவர்கள் முன்னறிவிப்புச் செய்துள்ளார்கள். யார் தலைமையில் அமையும் என்பதையும் தெளிவுபடுத்தியுள்ளார்கள்.

மஹ்தீ என்ற மன்னர் தோன்றுவார். அவர் தலைமையில் நல்லாட்சி அமையும். இதே போன்று இறுதிக் காலத்தில் நபி ஈசா (அலை) அவர்கள் வருகை தந்து நல்லாட்சி செய்வார்கள்.

இந்த இருவரின் தலைமையிலான இஸ்லாமிய ஆட்சி ஏற்படும் போது அதை ஒவ்வொரு முஸ்லிமும் ஏற்றுக் கொள்ள வேண்டும். அந்த நேரத்தில் இவர்களை ஒருவர் தலைவராக ஏற்க விரும்பினாலும் விரும்பாவிட்டாலும் இவர்களின் ஆட்சி கட்டாயம் ஏற்படும்.

அந்தக் காலத்தை நாம் அடைந்தால் நிச்சயமாக அவர்களின் ஆட்சியை ஆதரிப்போம். ஆனால் இஸ்லாமிய ஆட்சி என்ற பெயரில் மக்களை வழிகெடுத்துக் கொண்டிருக்கும் வழிகேடர்களை ஒருக்காலும் ஆதரிக்க முடியாது.

? பெண்கள் கப்ர் ஜியாரத் செய்யலாமா? ஜியாரத் செய்யும் பெண்களை சபிதுள்ளது பற்றி வந்துள்ள ஹதீஸ் விளக்கம் என்ன?

அய்யம்பேட்டை அலீம்

மண்ணறைகளுக்குச் சென்று வரும் பெண்களை நபி (ஸல்) அவர்கள் சபித்தார்கள் என்ற கருத்தில் சில ஹதீஸ்கள் உள்ளன. இப்னு அப்பாஸ் (ரலி), அபூஹுரைரா (ரலி) மற்றும் ஹஸ்ஸான் பின் சாபித் ஆகிய மூவர் வழியாக இந்தக் கருத்தில் ஹதீஸ்கள் அறிவிக்கப்பட்டுள்ளன.

இப்னு அப்பாஸ் (ரலி) அவர்களின் வழியாகவும் அபூஹுரைரா (ரலி) அவர்கள் வழியாகவும் அறிவிக்கப்படும் அறிவிப்பு பலவீனமானதாக உள்ளது. ஹஸ்ஸான் பின் சாபித் (ரலி) அவர்களின் வழியாக வரும் அறிவிப்பு மாத்திரம் சரியானதாக உள்ளது.

மண்ணறைகளைச் சந்தித்து வரும் பெண்களையும் அவற்றின் மீது விளக்கு ஏற்றுபவர்களையும் பள்ளி எழுப்புபவர்களையும் அல்லாஹ்வின் தூதர் (ஸல்) அவர்கள் சபித்தார்கள்.

அறிவிப்பவர்: இப்னு அப்பாஸ் (ரலி)

நூல்: திர்மிதீ (294)

இது பலவீனமான அறிவிப்பாகும். இதில் அபூசாலிஹ் என்பவர் இடம்பெற்றுள்ளார். இவர் பலவீனமானவர் என்று இமாம் இப்னு ஹஜர், இமாம் அபூஹாதிம், இமாம் நஸாயீ, இமாம் யஹ்யா பின் மயீன் மற்றும் பலர் கூறியுள்ளனர்.

அபூஹுரைரா (ரலி) அவர்கள் வழியாக வரும் அறிவிப்பும் பலவீனமாக உள்ளது.

மண்ணறைகளை அதிகமாக சந்திக்கச் செல்லும் பெண்களை அல்லாஹ்வின் தூதர் (ஸல்) அவர்கள் சபித்தார்கள்.

அறிவிப்பவர்: அபூஹுரைரா (ரலி)

நூல்: திர்மிதீ (976)

இந்த அறிவிப்பில் உமர் பின் அபீ சலமா என்பவர் இடம்பெற்றுள்ளார். இவர் பலவீனமானவர் என்று அப்துர் ரஹ்மான் பின் மஹ்தீ, அலீ பின் மதீனீ, யஹ்யா பின் மயீன், அபூஹாதிம், ஷுஃபா, முஹம்மது பின் சஅத், இப்னு ஹுஸைமா, இமாம் நஸாயீ ஆகிய அறிஞர்கள் கூறியுள்ளனர். எனவே இதுவும் பலவீனமான அறிவிப்பாகும்.

ஹஸ்ஸான் பின் சாபித் (ரலி) அவர்கள் வழியாக வரும் பின்வரும் அறிவிப்பு மட்டுமே சரியாக உள்ளது.

மண்ணறைகளை அதிகமாக சந்திக்கச் செல்லும் பெண்களை அல்லாஹ்வின் தூதர் (ஸல்) அவர்கள் சபித்தார்கள்.

அறிவிப்பவர்: ஹஸ்ஸான் பின் சாபித் (ரலி)

நூல்: இப்னு மாஜா (1563)

இந்த ஹதீஸின் அடிப்படையில் பெண்கள் மண்ணறைகளுக்குச் செல்லக்கூடாது என்று நாம் முன்னர் கூறி வந்தோம். இது தொடர்பாக வரும் மற்ற பல ஹதீஸ்களைப் பார்க்கும் போது பெண்கள் மண்ணறைகளுக்குச் செல்லக்கூடாது என ஆரம்ப நேரத்தில் நபி (ஸல்) அவர்கள் தடை செய்திருந்தார்கள். பிறகு இதற்கு அனுமதியளித்தார்கள் என்பதை அறிய முடிகின்றது. இதைப் பின்வரும் நபிமொழிகள் தெளிவுபடுத்துகின்றன.

ஆண்களும் பெண்களும் கப்று ஸியாரத் செய்யக்கூடாது என நபி (ஸல்) அவர்கள் முன்னர் தடைசெய்திருந்தார்கள். குறிப்பாக இந்த விசயத்தில் பெண்களுக்குக் கடுமையான தடையை விதித்திருந்தார்கள். பின்னர் இருவருக்கும் அனுமதியளித்தார்கள்.

அல்லாஹ்வின் தூதர் (ஸல்) அவர்கள் கூறினார்கள்:

அடக்கத்தலங்களைச் சந்திக்க வேண்டாம் என உங்களுக்கு நான் தடை விதித்திருந்தேன். இனி நீங்கள் அடக்கத்தலங்களைச் சந்தியுங்கள்.

அறிவிப்பவர்: புரைதா (ரலி)

நூல்: முஸ்லிம் (3995)

அப்துல்லாஹ் பின் அபீ மலீகா கூறுகிறார்:

ஒரு நாள் ஆயிஷா (ரலி) அவர்கள் மண்ணறைகளை சந்தித்துவிட்டு வந்துகொண்டிருந்தார்கள். அப்போது நான் அவர்களிடம், "இறை நம்பிக்கையாளர்களின் தாயாரே! நீங்கள் எங்கிருந்து வருகிறீர்கள்?'' என்று கேட்டேன். அதற்கு அவர்கள், "என் சகோதரர் அப்துர் ரஹ்மான் பின் அபீ பக்ர் அவர்களின் மண்ணறையிலிருந்து வருகிறேன்'' என்று பதிலளித்தார்கள். "மண்ணறைகளுக்கு சென்றுவரக்கூடாது என அல்லாஹ்வின் தூதர் (ஸல்) அவர்கள் தடை செய்யவில்லையா?'' என்று அவர்களிடம் கேட்டேன். அதற்கு அவர்கள், "ஆம்! முதலில் தடைசெய்திருந்தார்கள். பிறகு அவற்றைச் சந்தித்து வருமாறு ஏவினார்கள்'' எனக் கூறினார்கள்.

நூல்: ஹாகிம் (1327)

ஆயிஷா (ரலி) அவர்கள் கூறுகிறார்கள்:

ஜிப்ரீல் "உம் இறைவன் உம்மை "பகீஉ'வாசிகளிடம் சென்று அவர்களுக்காகப் பாவமன்னிப்புக் கோரும்படி கட்டளையிடுகின்றான்' என்று (என்னிடம்) கூறினார்'' என நபி (ஸல்) அவர்கள் கூறினார்கள்.

நான் "அல்லாஹ்வின் தூதரே! அ(டக்கத் தலங்களில் இருப்ப)வர்களுக்காக நான் என்ன சொல்ல வேண்டும்?'' என்று கேட்டேன். அதற்கு அவர்கள், "அஸ்ஸலாமு அலா அஹ்லித் தியாரி மினல் முஃமினீன வல் முஸ்லிமீன். வ யர்ஹமுல்லாஹுல் முஸ்தக்திமீன மின்னா வல் முஸ்தஃகிரீன். வ இன்னா இன்ஷா அல்லாஹு பி(க்)கும் ல லாஹிகூன்'' என்று சொல்'' என்றார்கள்.

(பொருள்: அடக்கத் தலங்களில் உள்ள இறை நம்பிக்கையாளர்களுக்கும் முஸ்லிம்களுக்கும் சாந்தி பொழியட்டும்! நம்மில் முந்திச் சென்றுவிட்டவர்களுக்கும் பிந்தி வருபவர்களுக்கும் அல்லாஹ் கருணை புரிவானாக! நாம் அல்லாஹ் நாடினால் உங்களுக்குப் பின்னால் வந்து சேரக்கூடியவர்களாக உள்ளோம்.)

நூல்: முஸ்லிம் (1774)

மண்ணறைகளுக்குச் செல்லக்கூடியவர்கள் அங்கே சொல்ல வேண்டிய பிரார்த்தனையை நபி (ஸல்) அவர்கள் கற்றுக் கொடுத்துள்ளார்கள். இந்தப் பிரார்த்தனையை ஆயிஷா (ரலி) அவர்களுக்கும் நபி (ஸல்) அவர்கள் கற்றுக் கொடுத்துள்ளார்கள்.

பெண்கள் மண்ணறைகளுக்குச் செல்லக்கூடாது என்றால் ஆயிஷா (ரலி) அவர்களுக்கு இந்தப் பிரார்த்தனையை நபியவர்கள் கற்றுக் கொடுத்திருக்க மாட்டார்கள்.

இந்த ஆதாரங்களின் அடிப்படையில் பெண்கள் பொது மையவாடிக்குச் சென்று, மண்ணறைகளைப் பார்த்து, மறுமை சிந்தனையை வரவழைத்துக் கொள்ளலாம்.

ஆனால் இந்த அனுமதி பொது மையவாடிகளுக்குத் தானே தவிர, இறைவனின் கோபத்துக்கும் சாபத்துக்கும் உரிய இடங்களான தர்ஹாக்களுக்குச் சென்றுவர ஆண்களுக்கோ, பெண்களுக்கோ அனுமதியில்லை.

? ஆஷுரா பற்றிய ஹதீஸில், ஒரு ஹதீஸ் ரமலான் நோன்பு கடமையாவதற்கு முன் நபி (ஸல்) அவர்கள் ஆஷுரா நோன்பை நோற்று வந்ததாகவும், மற்றொரு ஹதீஸில் நான் அடுத்த வருடம் இருந்தால் ஒன்பதாவது நாளும் நோன்பு வைப்பேன் என்றும் கூறியுள்ளார்கள். அப்படியென்றால் நபி (ஸல்) அவர்கள் ஒரு வருடம் தான் ரமலான் நோன்பையும் வைத்துள்ளார்கள் என்று அர்த்தம் வருமே? ஆனால் ஹிஜ்ரி இரண்டாம் ஆண்டு முதலே ரமலான் நோன்பு கடமையாக்கப்பட்டு விட்டதே? விளக்கம் தரவும்.

ஹஜ் முஹம்மத்

நபிகள் நாயகம் (ஸல) அவர்கள் மக்காவில் இருந்த போது அன்றைய மக்கள் ஆஷுரா தினத்தில் நோன்பு வைத்ததன் அடிப்படையில் தாமும் நோன்பு நோற்றனர். இதற்குக் காரணம் மூஸா நபி காப்பாற்றப்பட்ட சம்பவம் அல்ல. மாறாக அன்றைய தினம் கஅபாவிற்குப் புது திரை மாற்றப்படும் நாள் என்ற அடிப்படையில் அந்த நோன்பு வைக்கப்பட்டது.

ஆயிஷா (ரலி) அவர்கள் கூறியதாவது:

ரமளான் நோன்பு கடமையாக்கப்படுதவற்கு முன்னால் மக்கள் ஆஷுரா (முஹர்ரம் 10ஆம் நாளில்) நோன்பு நோற்றுவந்தார்கள். அது தான்  கஅபாவுக்குப் புதிய திரை போடப்படும் நாளாக இருந்தது. அல்லாஹ் ரமளானுடைய நோன்பைக் கடமையாக்கிய போது, "யார் (ஆஷுராவுடைய) நோன்பு நோற்க விரும்புகிறாரோ அவர் அதை நோற்றுக் கொள்ளட்டும்! யார் அதை விட்டுவிட விரும்புகிறாரோ அவர் அதை விட்டுவிடட்டும்'' என அல்லாஹ்வின் தூதர் (ஸல்) அவர்கள் கூறினார்கள்.

நூல்: புகாரி 1592

இதன் பின்னர் மதீனா வந்த பின்னரும் அந்த நோன்பைத் தொடர்ந்தனர். ரமலான் நோன்பு கடமையாக்கப்பட்ட பின் ஆஷுரா நோன்பு மக்கள் விருப்பத்தில் விடப்பட்டது. விரும்பினால் வைக்கலாம். விரும்பினால் விட்டு விடலாம் என்பது இரண்டாவது நிலை.

ஆயிஷா (ரலி) அவர்கள் கூறியதாவது:

குறைஷிக் குலத்தினர் அறியாமைக் காலத்தில் ஆஷுரா தினத்தில் நோன்பு நோற்றுவந்தனர். ரமளான் நோன்பு கடமையாக்கப்படும் வரை நபி (ஸல்) அவர்களும் ஆஷுரா நோன்பு நோற்குமாறு கட்டளையிட்டார்கள். (ரமளான் நோன்பு கடமையாக்கப்பட்ட) பின்னர் (ஆஷுரா நாளின் நோன்பை) நோற்க விரும்புபவர் அதை நோற்கட்டும்! விட்டுவிட விரும்புபவர் அதை விட்டுவிடட்டும் எனக் கூறினார்கள்.

நூல்: புகாரி 1892, 1893, 2000, 2001, 2002, 2003,

இதன் பின்னர் அதே நாளில் யூதர்களும் நோன்பு நோற்பதை நபிகள் நாயகம் (ஸல்) அவர்கள் அறிகிறார்கள். அவர்களிடம் இதற்கான காரணத்தை வினவுகிறார்கள்.  மூஸா நபி காப்பாற்றப்பட்ட நாள் என்று அவர்கள் சொன்ன போது மூஸா நபியை மதிப்பதில் நாங்கள் உங்களுக்குச் சளைத்தவர்கள் அல்ல என்று கூறி அன்றைய தினம் நோன்பு வைப்பதை ஆர்வமூட்டினார்கள்.

இப்னு அப்பாஸ் (ரலி) அவர்கள் கூறியதாவது:

நபி (ஸல்) அவர்கள் மதீனா வந்த போது யூதர்கள் ஆஷுரா நாளில் நோன்பு நோற்றதைக் கண்டார்கள். "இது என்ன நாள்?'' என்று கேட்டார்கள். யூதர்கள், "இது நல்ல நாள். இஸ்ரவேலர்களை அவர்களின் எதிரிகளிடமிருந்து அல்லாஹ் காப்பாற்றிய நாள்; இதற்காக (இறைத்தூதர்) மூசா (அலை) அவர்கள் நோன்பு நோற்றார்கள்'' என்று கூறினார்கள். நபி (ஸல்) அவர்கள், "உங்களை விட மூசாவுக்கு அதிக உரிமை படைத்தவன் நான்'' என்று கூறிவிட்டுத் தாமும் நோன்பு நோற்று, நோன்பு நோற்குமாறு (மக்களுக்குக்) கட்டளையும் இட்டார்கள்.

நூல்: புகாரி 2004, 3397, 3943, 4680, 4737,

ஆரம்பத்தில் பல விஷயங்களில் யூதர்களுடன் ஒத்துப் போவதை நபிகள் நாயகம் (ஸல்) அவர்கள் விரும்பியிருந்தார்கள்.

இப்னு அப்பாஸ் (ரலி) அவர்கள் கூறியதாவது:

அல்லாஹ்வின் தூதர் (ஸல்) அவர்கள் தம் (முன் தலை) முடியை, (தமது நெற்றியின் மீது) தொங்கவிட்டு வந்தார்கள். இணை வைப்பாளர்கள் தங்கள் தலை(முடி)களைப் பிரித்து (நெற்றியில் விழ விடாமல் இரு பக்கமும் தொங்க விட்டு) வந்தார்கள். வேதக்காரர்கள் தங்கள் தலை(முடி)களை (நெற்றியின் மீது) தொங்க விட்டு வந்தனர். அல்லாஹ்வின் தூதர் (ஸல்) அவர்கள் எந்த விஷயங்களில் தமக்கு (இறைக்) கட்டளை எதுவும் இடப்படவில்லையோ அந்த விஷயங்களில் வேதக்காரர்களுடன் ஒத்துப் போக விரும்பி வந்தார்கள். பிறகு, அல்லாஹ்வின் தூதர் (ஸல்) அவர்கள் தம் தலை(முடி)யை (இரு பக்கங்களிலும்) பிரித்து (வகிடெடுத்து)க் கொண்டார்கள்.

நூல்: புகாரி 3558

பின்னர் யூதர்களுக்கு அனைத்து விஷயத்திலும் மாறுபட வேண்டும் என்ற நிலைப்பாட்டை எடுக்கிறார்கள்.

அபூசயீத் அல்குத்ரீ (ரலி) அவர்கள் கூறியதாவது:

உங்களுக்கு முன்னிருந்த(யூதர்கள் மற்றும் கிறிஸ்த)வர்களின் வழிமுறைகளை நீங்கள் அங்குலம் அங்குலமாக, முழம் முழமாகப் பின்பற்றுவீர்கள். எந்த அளவிற்கென்றால் அவர்கள் ஓர் உடும்பின் பொந்துக்குள் புகுந்திருந்தால் கூட நீங்கள் அதிலும் புகுவீர்கள் என்று நபி (ஸல்) அவர்கள் கூறினார்கள். நாங்கள், "அல்லாஹ்வின் தூதரே! (நாங்கள் பின்பற்றக் கூடியவர்கள் என்று) யூதர்களையும் கிறிஸ்தவர்களையுமா நீங்கள் குறிப்பிடுகிறீர்கள்?'' என்று நாங்கள் கேட்டோம். அதற்கு நபி (ஸல்) அவர்கள், "வேறெவரை?'' என்று பதிலளித்தார்கள்.

நூல்: புகாரி 3456, 7320

இந்த அடிப்படையில் தம்முடைய கடைசி வருடத்தில், "அடுத்த ஆண்டு நான் உயிருடன் இருந்தால் ஒன்பதாம் நாளும் நோன்பு நோற்பேன்' என்று கூறினார்கள் ஆனால் அடுத்த ஆண்டு அவர்கள் உயிருடன் இருக்கவில்லை. 

இப்னு அப்பாஸ் (ரலி) அவர்கள் கூறியதாவது:

அல்லாஹ்வின் தூதர் (ஸல்) அவர்கள் ஆஷுரா நாளில் தாமும் நோன்பு நோற்று, நோன்பு நோற்குமாறு (மக்களுக்கும்) கட்டளையிட்டார்கள். அப்போது மக்கள், "அல்லாஹ்வின் தூதரே! இது யூதர்களும் கிறிஸ்தவர்களும் கண்ணியப்படுத்தும் நாளாயிற்றே?'' என்று வினவினர். அதற்கு அல்லாஹ்வின் தூதர் (ஸல்) அவர்கள், "இன்ஷா அல்லாஹ் (அல்லாஹ் நாடினால்) அடுத்த ஆண்டில் நாம் (முஹர்ரம்) ஒன்பதாவது நாளில் நோன்பு நோற்போம்'' என்று கூறினார்கள். ஆனால், அடுத்த ஆண்டு வருவதற்குள் அல்லாஹ்வின் தூதர் (ஸல்) அவர்கள் இறந்துவிட்டார்கள். (நூல்: புகாரி 2089)

மேற்கண்ட ஹதீஸ் மேலும் இரு அறிவிப்பாளர் தொடர்கள் வழியாகவும் வந்துள்ளது.

அவற்றில், "அடுத்த ஆண்டு வரை நான் உயிரோடிருந்தால் ஒன்பதாவது நாளில் நோன்பு நோற்பேன்'' என்று இடம் பெற்றுள்ளது. அபூபக்ர் பின் அபீஷைபா (ரஹ்) அவர்களது அறிவிப்பில் "அதாவது ஆஷுரா நாளில்' எனும் குறிப்புடன் இடம் பெற்றுள்ளது.

பார்க்க: முஸ்லிம் 1916, 1917

ஆஷுரா குறித்த மேற்கண்ட நிலைபாடுகள் வெவ்வேறு காலகட்டத்தில் நடந்தவையாகும். எனவே இதில் முரண்பாடு ஏதும் இல்லை.

Published on: March 10, 2013, 5:35 AM Views: 1540


www.onlinepj.com © 2013 Developed by Mwinsys

Scroll To Top